扮米原康正

雖然數碼相分享和執相都好方便，不過講到玩味就永遠唔及菲林相。縱然35mm菲林機日漸式微，但即影即有卻有不跌反升之勢，好似Fujifilm就出咗全新即影即有Instax Mini 8，足以證明還有市場空間；你仲可以買埋Nakabayashi Photoreco W掃描器，將相片轉存為數碼相，方便隨時Share畀朋友。

繽紛即影即有 Fujifilm Instax Mini 8

當個個都用數碼機時，偏偏有人鍾意玩菲林機，仲要係即影即有！慢慢等張相顯影的心情又真係幾過癮！其實好多人玩即影即有，不多不少都係受日本攝影師米原康正所影響，因為佢用Fujifilm Instant系列為很多美女拍性感作品而成為攝影奇葩。而坊間較多人玩的即影即有型號，正是米原康正用開的系列，貪佢夠細部，而且具線條美，亦常有新款式。近日廠方推出了全新的Instax Mini 8，用上新設計，自然更加好玩。

新增Hi-Key模式

Instax Mini 8有黑、白、黃、粉紅、淺藍五色畀你揀，而且開關亦經改良，以往需要人手拉出鏡頭開機，現在只要按下鏡頭旁邊的按鍵，就可以伸出鏡頭和開機；再加上曝光模式由機頂搬到鏡頭，還新增了全新的Hi-Key高色調模式，能夠營造「爆光」的柔和效果。Instax Mini 8配備了全新的觀景器，新觀景器改善了取景和實際拍攝的誤差問題，以後拍攝就無需刻意留位。此外，機身唔單止輕巧了一成，更只需要兩粒AA電池即可驅動；而最重要是Instax Mini 8依然對應多種款式的Instax Mini菲林，部分菲林更採用主題卡通人物，深受女生歡迎。

一掃變數碼 Nakabayashi Photoreco W

即影即有固然好玩，但Share就唔係咁方便。折衷的方法係用數碼相機或手機翻拍，不過翻拍始終有其他因素影響！最好當然係用掃描器把相片變為數碼相。Nakabayashi Photoreco W掃描器就可以幫你，佢唔單止可以掃描相片，甚至能夠掃描俗稱負片的35mm菲林底片，並轉為正片相。如果你以前儲落唔少負片，不妨將那些珍貴的相片和菲林變成數碼格式保存。

支援乾電攜帶外出

Photoreco W的用法非常簡單，只需要在機背的記憶卡槽插上SD卡，然後開機，再把相片送進掃描器，掃描器就會自動轉存JPEG或PDF檔案至記憶卡。點先睇到用緊咩Mode？其實可以根據指示燈的狀態識別，橙色燈代表轉存為PDF、綠色燈代表轉存為低質JPEG、綠燈與開關同時亮起則代表轉存為高質JPEG。掃描器更附有送片槽，以便將35mm負片掃描並轉為1,200dpi的JPEG影像，省卻了曬相的時間。此機可兼容A4尺寸的相片和文件，Scan相之外，更可以隨時把文件變為電子檔。

查詢：（a）2406 3225、（b）2730 5663