太歲頭上動土

月中開賣的MMM × H&M聯名系列，設計將「罵治」以往經典單品一次過復刻「大晒冷」，價錢仲相當親民（對比MMM不同Line出品），搞到一眾時裝人通宵排隊爭相入手。但勢估唔到，向來鍾意玩白油漆的MMM今次畀人玩番轉頭，「對手」正是曾惡搞Louis Vuitton、Marc Jacobs等時裝品牌專門店的法國街頭藝術家Kidult，近日就在MMM位於比利時首都布魯塞爾的專門店外牆上，噴上巨型黑色「Love」字樣、粉紅色心心圖案及三個骷髏頭Graffiti，右下更Tag上「Our Misery Not Your's！」贈興。有關方面其實大可參考Marc Jacobs的處理方案，為被塗鴉的紐約專門店拍下照片並製成Photo Print Tee出售，賺番多少！

Pasu Reporter

拜會鬼才大師

小記不時會訪問時裝品牌背後的靈魂─設計師，每次都「若有所得」。好似日前因銅鑼灣世貿中心重金禮聘的關係，小記有幸拜會美國鬼才設計師Jeremy Scott。以為這些設計大師最有性格又有脾氣，幸好，在十幾間傳媒車輪式採訪下，Jeremy也只不過訂下不答重複問題、不允許傳媒拍攝訪問照的規則。以為創作異乎常人的Jeremy性格誇張，真人卻又出奇地溫文爾雅，親切友善，問佢今季Must Have Item，佢笑說正值下雨的香港，應該是一把傘吧，哄得全場發笑！另一出奇位是，原來他並不會化妝，小記不相信，佢話唔信可以摸下佢塊面，可愛到呢，抵佢有咁多粉絲嘅！

Moe Reporter

80年代Oversized黑皮褸

有些東西，舊總比新的好，而且愈舊愈有味道，我所說的正是帶點歲月痕迹的古着皮褸，那種舊「皮」氣，是新買回來的完全比不上。有心買便宜古着皮褸，去老字號的出口店尋吓寶，必定有收穫。入秋前，我便找到這件80年代Oversized黑色皮褸，見車上Made in Hong Kong標籤，二話不說便收歸其下。就個人推斷，此為70-80年代的產品，當年香港製衣廠還未北移，見證製衣業光輝歷史，真的要向80年代致敬。

candy Reporter

太陽眼鏡人人戴得

對於有近視的人來說，戴「黑超」，一係先戴Con，一係換過塊近視太陽鏡片。手作設計師Iamkamty，就設計了所有人都能戴的太陽眼鏡，據說戴的人可透過「鏡片」上的小洞洞改善近視或遠視問題，視野更清晰，但吸引之處反而是鏡片上的食鬼、Mario、電視台Color Bar等圖案，非常Old School。最緊要是每副太陽眼鏡都是設計師親手繪製，包保獨一無二，肯定唔會同人撞款。

網址: iamkamty.com

Keith Reporter

adidas旗艦店靚仔晒！

早排行過漢口道，竟然撞正adidas重新粉飾後嘅旗艦店開幕，當日人頭湧湧，最吸引係舞獅環節，大會特別安排咗代表集團旗下三個品牌：Sport Performance、Originals同NEO既創意主題雄獅，本來傳統嘅開幕儀式，變得潮晒，不過仲潮嘅係，4個本地藝術創作單位：歌手薛凱琪、Graphic Airlines、Dorophy Tang同Paul Lung，參與adidas Originals Designer Chairs企劃，分別設計咗8張Designer Chairs，仲放喺舖頭二樓展覽，想知咩樣就自己去睇吓啦！

Amy Editor