人生首買新平衡

筆者有位姓林的同事是「新平衡」狂熱粉絲，天天腳踏出巡，猶如代言人一樣。小記多年來受其洗腦式力Sell，但都不為所動，直至早前受C記薄底布鞋所累，引致小腿經常痠軟不堪，才決定轉會試着。搜購過程也算大開眼界，原來「新平衡」有這麼多款式，當中574更是乜色都有，襯衫一流，最後一口氣買了泥黃及全黑兩款，方便配搭不同Vintage打扮。

至於着後感呢，的確比C記或亞滴凸獅的波鞋紮實舒適，行路時疲勞感稍減；然而整體上又唔算有好大驚喜。聽同事說，原來9系或千系會較為好，但價錢翻幾番，個人又認為唔多值。另外就是鞋底太厚，揸車踩油門時好冇安全感，最後兩雙鞋放多過着，看來小腿還要受苦一段日子。

Gilbert Reporter

「賣飛佛」紅色千系手

各位讀者，在下正是那位洗Gilbert腦的林姓人士。近年「新平衡」有唔少明星同潮友力捧，眼見好多型號好似M996GY、M1400SB都炒到成$2,000蚊對，小記就算鍾意都真係唔捨得買！不過有時買到心頭好都要講彩數，早幾日循例開Email，竟然發現美國公司J Crew做緊「折上折」大特賣；小記梗係即時𥄫吓睇咗好耐，但嫌佢貴嘅J Crew版M1400 Cranberry，點知有齊大路尺碼之餘，仲要全球免運費，送到屋企都唔使$1,000，簡值筍到冇人有！轉頭又行落旺角某著名水貨鞋舖，同款鞋仍然賣緊$1,699，足足平四成，嗰種執到平嘢嘅喜悅真係難以用筆墨形容呀！

Vincent Reporter

無端端買Tuner

屋企附近有間姓李的樂器店，聲言裝修大減價，本人抱着「話唔定有天價樂器筍價執」的天真願望入內察看。而殘酷的現實是，香港街道上果然是沒有巨型蛤乸跳躍的。在即將失望離店之際，卻發現Korg的Tuner，夾上結他頭就可以偵測音頻來調音；原價$150，加上方便過家中的盒狀舊款Tuner，仲有姣婆紅色揀呢！二話不說付款吧，埋單盛惠$150……說好了的減價呢？原來這產品，冇份。

Tony Editor

打邊爐食生嘢

何謂打邊爐？打邊爐就是將一大堆生的食物倒進火鍋中，讓它淥熟了才夾來吃。所以，小記一向抗拒在火鍋店食生的食物，不過今次在太子一間火鍋店卻嘗到比熟的和牛更加好吃的牛肉刺身！不知要讚抑或要彈，為顯示刀功，這盤牛肉刺身真的切得很薄，不過亦因此才有如此美妙的口感。

Michael Reporter

清邁小布偶

有種講法，去旅行買手信時，要揀當地生產嘅先好買，尤其係比較落後嘅地區，可以回饋番當地人民，幫助他們的經濟。我好贊同這種講法，如果係由民企或者小數社群開設的手工藝店，通常都會放低銀両以示支持。好似之前喺尼泊爾購買當地婦女縫製的針織袋，以及在墨西哥買了由小孩繪製的手製書籤。上趟去清邁時亦到了由社區組織Dor Dek營運嘅小店舖（Lonely Planet有介紹的），買了兩個Patchwork小布偶，工序雖然很簡單，手工比較粗糙，但每款小布偶都是由清邁街童縫製，每個只賣80泰銖（約$20），哪有不買之理？從每個小布偶上，都可隱約感受到街童們的歡笑與悲傷。

Brian Reporter