愈殘愈Like　HT DX T-800 Battle Damaged Version

頭雕走樣、拉鏈移位，任憑「驗屍官」如何雞蛋裏挑骨頭，Hot Toys × T-800呢個組合，幾時都係魅力非凡。正因如此，當DX10 T-800仲派緊貨時，DX13戰損版已經開訂，而且搞到大排長龍。頭雕、皮褸、技術都屬巔峰之作，最爆係送埋T-1000立體雕像，就算定價直逼$2,000大關，相信《Terminator》嘅死士情願死慳死抵，都要據為己有。

就算阿諾舒華辛力加已經六十有五，但一句「I'll be back！」，依然叫Sci-fi粉絲入腦到依家，與Terminator結下不解緣嘅HT，亦決定第四度炮製T-800呢個角色，並聲言︰「T-800喺戲中有好多造型，斷手、爆頭皮，我哋都做過，依家係時候推出粉絲最期待嘅戰損版，藉此將我哋嘅技術發揮得淋漓盡致。」

爛肉雙頭雕

正如DX10，頭雕依然出自Yulli及K.A.Kim呢對金牌組合，五官、神情、箭豬頭嘅神似度都毋庸置疑，而且採用雙頭雕，一款內藏P.E.R.S.可轉眼系統、爛肉面積較小；另一款左眼可轉、右眼內藏紅色LED冷光，爛肉位亦都較多。爛肉係整個Figure嘅精髓所在，呢部分由JC.Hong負責，將血肉及機械頭骨分開上色，除了可突出層次感，亦都避免出現「飛油」問題。

皮褸激光開窿

雖然HT出過T-800唔少次，不過今次戰損版嘅Body係重新製作，唔係用番DX10改少少了事，心口及膝頭都加入爛肉及機械骨架，左手肘位仲拆得落嚟，換上另一隻機械斷臂，玩法跟MMS-117相同。服飾方面，皮褸、皮褲當然唔少得，皮樓仲有兩件替換，當中嘅破爛位原來用激光開窿，再用砂紙打磨及舊化上色，製作認真程度可見一斑。

閃令令液態T-1000

配件方面，武器就有榴彈槍、突擊步槍、手槍，仲有12發榴彈掛喺孭帶，不過唔通火神炮、霰彈槍喺DX10已經出過，所以今次抽起咗？個人認為送埋就更加皆大歡喜。地台係另一亮點，着燈正方形嘅台座未算特別，最正係同比例嘅T-1000液態雕像，表面做足電鍍工夫，成隻反晒光、閃令令，右手仲整成開窿形態，模擬戲中被T-800打穿一幕，就算已經立誓唔再敗家買玩家嘅《Terminator》粉絲，睇怕甘願背負「食言」嘅罪名，講過唔認數吧！

零售價︰$1,980

預售價︰$1,930

推出日期︰明年第二至第三季

查詢︰2388 4677（Toy Hunters）