關島四處闖蕩搵食

在關島，Shopping主要都是圍繞杜夢灣大街的商場區，不過講到搵好嘢食，就非要捐窿捐罅不可。如果閣下有車牌，不妨好似我一樣租架車仔，離開杜夢灣四處闖蕩，你會發現關島東西南北也有美食等待大家發掘！

兜風睇奇石

一朝早怕且大家都未有胃口，不如先向人煙較少的南邊兜番轉也不錯，全島大部分道路時速最高只有35英里，而且路面寬敞，大可安心「慢」遊。沿着4號公路南駛到阿法燕海灣，可欣賞到一塊有如巨熊看海的熊石（Bear Rock），而且路旁有片小斜坡可停泊車輛，隨時下車影張熊抱或拍打熊石的趣怪相都無問題！

伊納拉漢潭（Inarajan Pools）則是一個久經海水侵蝕的小海灣，外邊有多重天然岩礁環抱，加上水最深達3米多，變相成為一個深水游泳池，難怪引來不少珊瑚魚在此暢泳。自問大膽的朋友更可試跳旁邊的石屎跳台，我齋睇已Feel到好刺激！

賊竇海鮮餐

又跳又浸，成身濕晒仲點去開餐呢？原來咁仲啱，皆因關島南部泰勒佛佛區（Talofofo）有個海盜灣，裏面有間30幾年歷史的Jeff's Pirates Cove海盜主題餐廳，如果閣下「乾爭爭」入去，我怕會惹人懷疑啊！這個「賊竇」裝潢極之囂張，門口有個又藍又橙，如汽車大小的浮標作招牌，上面更有海盜必備的骷髏頭圖案，包保大家一眼就望到！加上餐廳前半部分是購物區，有關島的小飾物外，還有色彩搶眼的便服出售，若然衣衫濕了亦可即時替換。

海盜主食是甚麼？當然與海洋有關，Jeff's Pirates Cove最出名的菜式，就是全海鮮的Fiesta Seafood，包括炸得香脆的魚柳、墨魚圈和大蝦，配以傳統集豉油、醋、辣椒及洋葱製成的Finadene，味道酸酸辣辣特別醒胃。自家製的半磅芝士漢堡也是必吃之選，手打的牛肉十分彈牙，加片半溶的車打芝士和青瓜，香味四溢又帶點清甜，漢堡包都可吃得好滋味！吃飽飽還可參觀海盜王Jeff的私人博物館，原來他對二次大戰時、在關島隱居達28年的日本逃亡戰士橫田素一（Shoichi Yokoi）甚崇拜，收藏了不少他的相關相片和書籍呢！

Jeff's Pirates Cove

地　　址：4 Talofofo, Guam

營業時間：11:00am-6:00pm（星期一至六）、11:00am-7:00pm（星期日）

電　　話：（1） 671 789 1582

網　　址：www.jeffspiratescove.com

查莫洛飛艇

關島查莫洛族（Chamorro）的海洋文化也相當濃厚，好似位於中部Ypao Beach的Proa餐廳，名字就是查莫洛人引以為傲的子母雙體快艇，相傳西班牙航海家麥哲倫初到關島時，已深深被Proa的速度吸引，更喻為「飛艇」。餐廳外牆雖然毫不起眼，似是民居平房，但入內後發現無論牆壁或天花均掛滿子母雙體快艇的模型和裝飾，凸顯查莫洛特色；加上餐廳屢獲飲食獎項，今年5月又再次獲得當地的「People's Choice」大獎，譽滿全島，難怪客似雲來，想一嘗美食最好前一天預先訂位。

講到咁巴閉，究竟有甚麼好介紹呢？首推Proa BBQ，其紅飯是以最傳統的查莫洛手法烹調，將當地的Choti樹的紅色種子磨碎，混合鹽水一起煮，入口質感較有嚼勁並帶點樹香，與軟綿煙韌的絲苗白飯完全不同。BBQ的肉類取材亦十分廣泛，有齊牛仔骨、豬肋骨和雞扒，選用獨家的烤油醃製，甜酸味十分濃郁，可說是送飯佳品；而頭盤Chicken with Chipotle，集傳統與新穎於一身，以傳統牛油果餡餅蘸Chipotle濃汁，再配上雞或牛肉，香滑又惹味！

Proa

地　　址：Ypao Beach Pale San Vitores Road, Tamuning

營業時間：11:00am-12:00mn（星期一至六）、6:00pm-10:00pm（星期日）

電　　話：（1） 671 546 7762

租車自駕

講到租車，關島其實方便到不得了，皆因多家租車公司也於機場設有服務櫃位，例如AVIS，小巧的4人車至15人的小型巴士（須持巴士牌照）都有提供，只要年滿21歲，持有國際車牌，就可在出發前一星期預約，到達後立即拿車出發四處去，最正是關島大部分泊車位是免費的，行到邊泊到邊都無問題！

AVIS

營業時間：24小時全年無休

日　　租：US$60（約HK$468）起

網　　址：www.avisguam.com

Info

簽證：持特區護照或BNO毋須簽證

機票：香港飛關島來回經濟客位機票約HK$4,445起

貨幣：US$1約兌HK$7.8

天氣：11月份氣溫約25℃-31℃

時差：快香港2小時