斷碼超值價

孤伶伶一個男人去輕鬆吓，真係好易受街外嘅引誘o架！早排放假逛逛老尖，喺加記有好大間體育用品散貨場，小編每次路過都例必入去巡一巡，一入到去，我個內置「血拼」雷達即時發現呢對今春方登場嘅adidas adiPure 11 Pro波砵，原價要$1,299，依家斷碼只此一對陳列品超值價$599！仲要斷碼得嚟開正我個Size，真係緣分呀！縱使家中已有多對草地波砵，但係你理得我吖！況且，上周着過落場，真係超舒服呀！

Tony Editor

呻笨買得少

剛剛跑了一轉菲律賓，出國自然離不開買手信，買地道食品就最穩陣。要講菲國最出名就一定係7D杧果乾，話晒都拎過獎，買畀人唔怕失禮，而且小記可以證明呢個獎唔係「豬肉獎」，因為杧果乾的味道好食到暈，唔似本地杧果乾食完要飲水，仲好重杧果味，完全唔似副製品，個獎實至名歸，所以一口氣掃了十包，每包大約110披索，即大約$22港紙。返到香港就呻笨喇，小記自己一個人都吃了五包，點知仲未夠喉，另外五包就送晒畀人，早知就買夠廿包啦！

Jason Reporter

隨心決定景深

小記最近睇過一個廣告，對其中一句對白很有印象，前文後理不記得了，只記得一句：「隨心決定景深。」嘩！大佬，景深可以隨心決定，那麼光圈、快門都可以撞彩調校啦！對焦、變焦又可以感性靠估啦！之所以講起此廣告，全因最近買了隻3D藍光版《阿凡達》，覺得3D立體感做得很細膩，最重要是沒有為盲目追求立體感而勉強拉遠前後景深，不用睇到眼都花，要立體時有立體，但沒有影響整體畫面流暢感。不知道占士金馬倫拍阿凡達時，是否也是隨心決定景深呢？

Angus Reporter

與夢奇奇飛馳

是咁的，有人說過汽車可以反映車主性格，套用在小記身上同樣適用。小記座駕唔算辣，都總算有幾分跑味，跟小記外表一樣咁惡咁Cool。然而，所謂鱷魚頭老襯底，其內心卻充滿童真。看！剛購買的夢奇奇（Monchhichi）頭枕跟安全帶套是多麼可愛啊！而且用起來舒適無比，給後頸及胸肌最貼心保護，難怪好友坐過後，都話舒服到唔捨得落車！

Gilbert Reporter

難看的美味

小記一向對於M記推出的限定食品特別鍾情（蝦堡除外），所以一聽到M記再出呢個黑椒漢堡，就即刻以九秒九嘅速度率先試食。呢個包除咗特別好食之外，佢另一大特點係特別醜樣！不過愈醜樣，即係代表愈多汁、愈好味，據聞網上甚至有人特登上載各款呢個包嘅醜態肉酸照，包你睇完之後，都唔知食唔食好。

Michael Reporter