《刺客教條3》玩轉美國獨立史

《刺客教條》（Assassin's Creed）系列除咗可在古城上飛簷走壁同埋執行刺殺任務外，內裏的歷史故事都好值得細味，不過前兩集都只得英文版，未必個個玩家可參透內容。好在《刺客教條3》就首次推出中文版本，輕鬆瞭解18世紀美國獨立戰爭時期的歷史背景，而且中文版本更比英文版送多三個單人關卡同內容組合包，真抵玩！

混血主角樹上行走

《刺客教條3》將故事舞台由歐洲搬到美洲，仲要講18世紀美國的獨立戰爭。遊戲背景主要圍繞波士頓，以真實事件作為藍本，用中文字幕解釋歷史內容，亦比英文更易明。今集主角係英國跟印第安人混血兒康納（Connor），絕招是可以在樹上行走，然後不動聲色放弓箭暗殺目標，或從高處撲擊，而且仲識得狩獵，可以靠鮮肉同毛皮賺錢，比起之前主角Ezio或Altair都更Man。話雖如此，由於幾代主角背後都有住DNA的關連，所以招牌式爬到城市最高點塔尖躍下滑翔，以至袖裏劍仍然照樣可以在康納身上見到。始終時代同地理背景唔同，康納今次仲可以用埋弓箭、火槍或中國式的繩鏢做武器呢！

逼真海戰場面

故事以1773年波士頓傾茶事件開始，講北美殖民地人民抵制英國貨品，將昂貴的英國茶葉倒落海，最後爆發1775年美國獨立戰爭。遊戲有得玩獨立戰爭的第一場軍事衝突，著名的列星頓和康科德戰役，而PS3版本更可以下載「叛徒」美國將軍班乃迪克．阿諾（Benedict Arnold）於1780年把要塞交給英軍的60分鐘任務。不過遊戲一開始，其實未到康納出場，而係先扮海爾森．肯威在駛去美洲大陸的船上打海戰，亦係系列作中首次加入海戰元素。打海戰既要瞄準敵艦發炮，仲要控制風帆同掌舵，難玩過面對面隻揪，另外唔少支線任務都可以玩海戰。而新遊戲引擎AnvilNext就令遊戲畫面表現得非常精細，尤其係大規模交戰場面，及季節、氣候變化都交足功課，主角康納更有成1,000種動作表現，變化十分細緻！

可跟PSV遊戲連動解鎖

是次中文版《刺客教條3》雖然唔支援Ubisoft自家的Uplay功能，但係一樣可以同三星期前推出、以女刺客為主角的PS Vita版《Assassin's Creed III： Liberation》連動，解鎖四項獨佔內容，喺PS Vita版上紐約關卡扮演康納，玩家就唔使怕中文版支援不足。中文版亦會額外收錄本以DLC形式推出的三個獨立關卡「危險的秘密」、「幽靈之戰」同「失落的馬雅遺迹」，另外送多四款內容組合包，等大家可以在遊戲中為主角換新Look。今集多人模式加強不少，而且一切都係以追捕者同被獵者關係呈現，被獵者須避開追捕者的追殺，或者可以匿埋趁機打暈追捕者，但唔可以掉轉頭追殺對方。模式方面就有類似搶旗仔的「神器之戰」，將聖器搶到自己區域；「雄霸天下」則是雙方鬥搶地圖上的A、B、C三區，追捕者同被獵者身份會因為身處邊個區域而即時轉變。不過筆者更鍾意「狼群模式」，要聯同其他玩家一齊挑戰電腦，要在限時內齊齊搵到暗殺目標，仲要施展具創意的暗殺方法取分，每一波都會增強難度，愈玩愈難！

INFO

類型：動作

開發：Ubisoft Montreal

平台：PS3、Xbox 360、PC

推出日期：11月27日

售價：$388（PS3及Xbox 360）、$320（PC）

查詢：2341 2356（PS3）、2418 8896（Xbox 360及PC）