Nicola Formichetti情迷亞洲之女

Mugler 創作總監兼Lady GaGa老友Nicola Formichetti，似乎同香港「模Art」Angelababy以及日本紅爆偶像Kyary Pamyu Pamyu大纜都扯唔埋，不過時尚界就是經常發生愈唔關事就愈出位的事件，見怪不怪。最近以上三位齊齊上英國版Dazed & Confused 12月號封面，一共有四個Cover。原來今次Nicola親自擔任客席編輯，咪大驚小怪，其實10年前佢已經喺呢本雜誌做初級時裝編輯，10年間就爬到上去創作總監呢個位，而雜誌創辦人Jefferson Hack 為咗同Nicola慶祝這個重要里程，所以就搵咗佢做封面。Nicola近期因為迷上亞洲，決定以Fantasia為主題，搵埋兩位具代表性的亞洲靚女拍住上，點解揀中Angelababy？Nicola話貪佢人氣勁，在微博有20億人關注。而Kyary Pamyu Pamyu，係因為睇YouTube時見佢夠癲喪，十足東京嘅GaGa。之前雖然曾經合作過，但希望再借影封面，見多佢一面喎。當然Nicola仲順便介紹埋Mugler最新推出嘅手袋，今次係為向GaGa嘅Pat Pat致敬喎，售價880英鎊，你有興趣無？