泰國自駕4大錦囊

自駕遊之輕鬆靈活,毋須多講,但自駕遊之目的地又應如何選擇呢?以香港駕車人士的習慣,選擇右軚國家就最穩陣,亞洲多國中,除了大家駕慣駕熟的日本,就要數近期上位的泰國,唔講唔知,原來泰國的GPS全球定位系統準繩度直逼日本,即使是路盲,自駕都話咁易,睇埋下面的4大錦囊,即可隨時出發!

錦囊1:網上預辦

女傭廣告教大家「揀間有名氣啲嘅」,選擇租車公司道理亦一樣,不少國際大型租車公司如Hertz和Avis,在泰國都設有分部,而且提供網上預辦租車服務,可以安安樂樂在香港填好表格揀好車款,到達當地即時取車,唔使左等右等,節省唔少時間。

錦囊2:活用GPS

泰國公路網絡完善,南北西東全部陸路可達,不過GPS操作不如北海道般方便,輸入電話號碼未必可以帶你去目的地,因此,出發前最好先計劃大概行程,再去Google Map抄低景點坐標,以便尋找最準確的路線。

錦囊3:入油注意

每個型號的車款都有指定使用的汽油類別,記緊留意油缸蓋內的標示選擇相應汽油,泰國大部分油站均有多款汽油可供選擇,油價亦沒有太大分別。另外,還車前記得要加滿油缸,以免被徵收附加費。

錦囊4:曼谷免駕

除曼谷外,泰國大部分地方泊車均屬免費,自駕計落有着數;至於曼谷,市內公共交通配套本身已十分方便,加上塞車情況有目共睹,除非你特別鍾意坐車,否則絕不建議於曼谷市內自駕。

Ying