LG Vu II巨芒二代目

今時今日拎部巨芒手機出街，相信冇人敢笑你係傻仔，君不見Note II月賣300萬部嗎？作為韓國手機第二把交椅的LG，眼見對手部Note出到第二代，旗下打對台的Vu II亦緊接於上月在韓國發售，除保留招牌5吋4:3巨芒外，如配合Q-Remote及QuickTranslator兩大功能，還能遙控電器甚至用鏡頭翻譯文字，傳統Remote同字典可以掟埋一邊！

$4,880

搭載Android 4.0.4系統，並提供七版首頁。

Vu II（左）屏幕面積不及Note II，但亮度及仔細度就優於對手。

厚度比上代微增0.9mm，但大芒機來說依然算薄。

機背印有Monogram幻影暗花，配合銀邊鏡頭，感覺Cyber。

電池容積達2,150mAH，惟留意要拆電先換到microSIM。

跟機送Flip Cover，但不設感應功能，只可用來保護屏幕免刮花。

系統只要聽到有人大嗌Cheese或Smile就會自動按快門，至啱用來影大合照！

提供3.5mm介面，並附送入耳式耳機一對。

Q-Remote兼容LG、Samsung等電視牌子，而且連型號都唔使揀就可成功配對。

有齊音量、轉台等按鍵，更可放晒落下拉式選單，方便操作。

用鏡頭掃一掃文字，就能作出即時翻譯。

另一程式《DioDict 3》，可直入中文再翻譯成多國語言。

保留畫圖功能，並可選筆頭款式、粗幼、顏色及透明度。

用戶可調校Q-Slide影畫的透明度，返工時可偷偷睇片。

有中文介面，仲有埋倉頡輸入法，睇同打中文都唔怕有亂碼！

試片
畫面銳利明亮，味精不重，但上下兩條黑邊就有點礙眼。

以前水貨手機以日系機為主，但因中日關係較緊張，近月水貨商開始另闢貨源，當中又以韓國機最受歡迎。除因為它們功能比行貨更先進外，部分還提供中文介面，並對應本地的1,800MHz LTE頻譜，對追Phone一族甚具吸引力。

正方巨芒大電池

講全球銷量，LG Vu系列當然不及Samsung Note，但在韓國本土來說，前者銷量亦超過50萬部，絕對有力一鬥。來到第二代，廠商保留賴以成功的5吋4:3正方巨芒，並沿用IPS LCD材質；若鬥畫面尺寸，雖沒有Note II那麼大，但細緻度及亮度卻更勝一籌。針對女士需要，Vu II亦來個大瘦身，比前代短了7.4mm、窄了4.8mm，並同時偷輕了9g，手感更佳。另外，今代電池終於可以更換，而且容積微增至2,150mAH，比上代更長氣！

控制全屋家電

上代Vu力推畫圖，惟今代除了升級Rubberdium 2.0觸控筆，令觸控更準外，就不見其他新功能，而且連截圖用的QuickClip掣也抽走，皆因重點放到其他功能上；Q-Remote就是其中之一，只要一經啟用，就能以手機遙控LG甚至其他大牌子的電視、音響、機頂盒及冷氣機。實測所見，只要揀選好電視牌子，就能成功配對，並且有齊選台、開關機及音量調節；而用戶更可把按鍵全放到下拉式選單內，篤兩篤就控制全屋主要電器，唔使再為搵Remote而周圍摷！

鏡頭一掃即翻譯

機能方面，Vu II冇跟風玩四核心，而是採用1.5GHz雙核心處理器及2GB RAM，單睇Benchmark分數唔及Note II，但實測見煲劇和上網都幾順；而且它的Q-Slide畫中畫功能可校埋透明度，比對手的Popup Play更出眾！至於Voice Shutter和QuickTranslator這兩個功能絕對值得一提，前者只要講出Cheese、Smile等字眼就自動拍照；後者則可用鏡頭掃一掃單字或句子翻譯，並對應日、韓、法等64種語言，出國旅行勁啱使！