挑戰百次掌上壓《Runtastic PushUps PRO》

大家可唔可以連做100次掌上壓？就算做唔到都有得操，用《Runtastic PushUps PRO》就可以幫到大家。程式入面有三個Level，設定目標畀大家練習，而且仲會有語音幫你數做咗幾多次！究竟呢個App又點數到大家做到幾多次掌上壓呢？就係將手機放在地下，每做一下用鼻尖掂一掂畫面囉！

平台：iOS 6、Android 2.2或以上

下載費用：$8（iOS）、$7（Android）

星球大戰鳥《Angry Birds Star Wars》

當以綠豬為主角的《Bad Piggies》都未玩得完，Rovio又出咗新版「憤怒鳥」！今次嘅矚目程度真係有得同《Angry Birds Space》相比，因為係玩《星球大戰》！一開App就聽到大家熟悉非常的星戰背景音樂，玩到第六關，綠豬會笠上頭盔扮白兵，玩家仲可以彈出由黑鳥客串的絕地武士，在臨近撞到目標物時釋放原力，將旁邊的磚頭及冰塊擊碎！

遊戲新招式都係向星戰借鏡，玩到後期仲可以使用光劍劈豬；唔知會唔會講經典對白「I am your father」，但就肯定黑武士係由豬扮演。今集仲可以玩角色集圖冊，每遇上新造型角色，都會自動記錄在主畫面的Gallery內，隨時可以翻閱。場景方面當然亦好有星戰Feel，甚至乎加入如《Angry Birds Space》的外太空無重力關卡；此外亦可以解鎖R2-D2、C-3PO等秘藏角色道具，睇嚟星戰迷真係可以有排玩！

平台：iOS 4.3或以上、Android 2.2或以上

下載費用：$8（iOS）、$23（iOS HD版）、免費（Android）

尋找同伴過關卡《About Love, Hate and the Other Ones》

從名稱都好難估到此乃遊戲App，而且仲得到德國今年嘅遊戲獎，相信有一定睇頭。大家又唔使驚德國Game唔啱口味，因為遊戲主角係造型可愛的黑白色公仔，要在每個關卡上解謎，並且要尋找五種各有唔同特別技能的同伴「the Other Ones」去完成共60個關卡。

平台：iOS 3.2或以上

下載費用：$8

玩複製人合照《Clone Camera》

加入唔同特效濾鏡的影相App實在多不勝數，筆者近期就迷上「蜷川實花」影相App，但呢隻《Clone Camera》取向就有啲唔同，從名稱就知道佢係玩複製。玩法係最多連拍四張相，再從每張相Highlight番個人出嚟，並Key落另一張相上，變成最多有四個「複製人」同場拍攝的相片，但係收$15似乎有啲貴囉！

平台：iOS 5或以上

下載費用：$15

連線開打大戰略《World At Arms》

現時好多手機遊戲都係免費，再以In-App Purchase形式引大家買道具，Gameloft最新推出的戰略遊戲《World At Arms》都唔例外，而且由於係大廠出品，更有中文支援，唔怕唔明遊戲操作。故事講國家受到KRA部隊攻擊，身為自由世界領袖的玩家就要迎戰，設計有啲似《大戰略》或者卡片遊戲《Risk》。

玩家所要做嘅任務都唔少，例如要管理財政、搶奪資源、開發武器、建立軍事基地、召集同訓練軍隊，目標當然係要開戰打低對手。遊戲入面共設有75項以上任務，戰場方面有空中、沙漠、城市同雪地，無論建築物以至戰鬥動畫都做得好有水準。單機玩之外，遊戲亦支援Gameloft LIVE！社交功能，大家可以同朋友分享道具、結盟出擊或主動攻擊對方，以獲取各種戰利品。暫時Gameloft會先推出iOS版，而Android版都會在本月內推出。

平台：iOS 4.3或以上

下載費用：免費

平實多功能記事《Weave》

就算在iPhone上用備忘錄、行事曆甚至乎Passport，都唔可以一個App做晒記事、安排行程甚至係草擬Project多種用途，但透過呢個免費App《Weave》就做到晒。程式設計唔多花巧，但就好容易加入To do List，又可在支出表上輕鬆地轉換外幣，亦會在限期前將到期的事項置頂通知用戶。

平台：iOS 4.3或以上

下載費用：免費