《Hitman：Absolution》蟄伏6年殺手回歸

好多玩家都等緊光頭殺手Agent 47回歸，着草六年嘅佢，下星期就會蒲頭，執行一連串暗殺行動，佢嘅仇家最好避吓風頭喇！這六年間連發行公司都由Eidos轉到去Square Enix，Agent 47都無偷懶，在今集《Hitman： Absolution》入面將會用盡一切喬裝手段刺殺，用槍、用刀，甚至會炸死目標人物，手段有幾兇殘得幾兇殘，連Square Enix都話過Agent 47是次回歸必爆，甚至連《Call of Duty： Black Ops 2》都唔放在眼內咁話！

畫面流暢度極高

市面上有關光頭殺手Agent 47的消息都傳咗好幾年，09年話繼續由佢孭飛的新一集《Hitman》已經開始製作，到11年4月《Hitman： Absolution》正式開名，並且有預告片推出，結果都係要等多一年半後先至肯蒲頭。今集遊戲改用咗全新Glacier 2技術去開發，雖然細睇之下，遊戲精細度未必係最Top嘅級數，但動作流暢度同像真度真係花過唔少心思去製作，可以話係目前最高水平。主線講Agent 47之所以豹隱咁多年，皆因被曾經信任嘅人出賣而被追捕，於是要在黑道上隻身闖蕩，搵番啲仇人報仇。

上百款殺人招式

玩得《Hitman》，當然最期待係遊戲入面嘅殺人方法到底有幾激。早前廠方更釋出一個小型支線故事《Hitman： Sniper Challenge》畀玩家扮演Agent 47，於固定位置用狙擊步槍解決遠處的武器製造商同佢班守衞，但係真正遊戲裏面又點會只係用狙擊槍殺人咁單調吖！遊戲入面有近百種殺人方法，主要武器都係槍，但有時殺人係要食腦嘅，單槍走出來與一眾敵人駁火實無好結果，所以要運用環境上嘅特點，好似有關卡係要靠射爆滅火筒來炸爆附近嘅敵人；有時亦要用電，令行刺目標觸電而死。不過都有啲無咁花巧的殺人方法，就係從後用斧頭或者刀仔解決對手，就連「小李飛刀」一樣有得用！執行刺殺任務的地點都好多元化，入公廁廁格又有，去到舞會殺人又有，或者好似之前6月E3試玩版去到中國繁華街頭殺人都有！

喬裝殺人順手收屍

喺遊戲入面當殺手唔難，諗用邊招殺人都未算難，最難係點樣可以不動聲色接近目標人物落手，以及事成後如何甩身！今集Agent 47再施展百變形像，唔止可以學似占士邦新片《Skyfall》入面反派角色Silva扮警察從地鐵站甩身，Agent 47在遊戲裏會扮埋酒店服務員、壽司師傅、工程人員，甚至係戴起假髮扮法官，着起宣傳衫懶可愛扮熊人添，為咗殺人真係可以冇底線。靠住各種偽裝手段，Agent 47要接近目標人物自然比起成套老西滿身殺氣容易得多。不過有時為咗要解決目標人物，遊戲入面無可避免地都要先解決守衞或保鏢等嘍囉角色，但如果成地都係死屍會容易被人發覺，所以解決完這些嘍囉後，就要搵地方藏屍，衣櫃就係一處好地方。今集入面就會加入一個名為「Instinct Mode」模式，用「天眼」預視敵人的巡邏行走路線，可以預先部署好晒先至郁手！

INFO

類型：動作

開發：IO Interactive/Square Enix

平台：PS3、Xbox 360

推出日期：11月20日

售價：$388（PS3）、$389（Xbox 360）

查詢：2341 2356（PS3）、2418 8896（Xbox 360）