長頸鹿蕉

不論成田定係羽田,十次由東京飛返香港,八次都會買「蕉」做手信。所謂「蕉」,就係機場名物Tokyo Banana「東京蕉」喇!最初只係得「黃蕉」一款,幾年前出埋朱古力味的「黑蕉」,舊年唔記得紀念幾多周年,出過特別版焦糖味同極其限量的「金蕉」,到今年年底仲出埋用上長頸鹿紋的「長頸鹿蕉」,筆者呢幾年親眼同親身用荷包見證住「東京蕉」的轉變!「長頸鹿蕉」好唔好食?雖然食唔出同之前有幾大分別,但仍然咁好味;而最驚喜係除咗原來的12件同8件裝之外,仲出埋4件裝膠兜迷你版,每盒¥500,買多幾盒送畀朋友都方便啲!

Brian Reporter

Miffy和式結婚公仔

筆者正計劃人生大事,明年就係好日子,若然遇到啱用物資,一定會提早入手。例如影結婚相必備的「結婚公仔」,早前喺拍賣網見到一對Miffy結婚公仔,兩隻兔仔均穿着手工精美的和式禮服,遠比婚紗版本靚得多!雖則要賣成八舊水,但物以罕為貴,加上筆者亦打算到日本影結婚相,襯絕!只好乖乖付錢。不過有人嫌太貴,但對筆者嚟講,買咗係一份心意,絕對唔係負擔!

Alfred Reporter

中文版夠親切

雖然PSV係就係出咗好耐,不過一直都唔見有太值得玩嘅Game。老實講,RO系列係幾啱小記「合尺」,但係幾百蚊隻Game淨係得日文就真係有啲唔開心,好彩早排終於出埋繁體中文版,起碼唔使攻略都知自己要打咩怪獸。隻Game本身無得暫停,但係一按主畫面個掣就會自動暫停,落車時想停Game就停Game,唔錯!

Michael Reporter

傷膝的男子

對成日做運動嘅人而言,最難受就係膝頭哥傷患。嚴重的話,可以收山;就算好得番,都媲美白鱔上沙灘。膝蓋冇病冇痛嘅人,以及完全唔做運動嘅人,你哋係唔會明呢份挫敗感o架喇;但如果你好似小編咁,三字頭,長年累月做運動,膝頭哥虛虛地,跑完步又見痠軟又覺痛,我建議你紮一紮佢好。早前小弟就花二百幾蚊買咗個McDavid護膝,佢特別在入面嗰兩塊軟墊可自由擺位,打橫放頂住膝蓋上下又得,打直放夾實膝蓋兩側亦得!傷膝的人,不妨諗諗佢。

Tony Editor

童年回憶威化餅

仲記得小學一打「冷鐘」放小息嘅時候,同學仔就會狂奔到小食部買零食;小食部賣嘅熱賣產品眼鏡朱古力同戒指糖,依家想搵返嚟回味一下都唔係咁易!最近小記偶然喺大埔廣福道零食小店,竟然搵到當年同樣熱賣嘅朱古力威化,唔單止金色包裝同以前一模一樣,就連嗰隻唔甜唔苦嘅朱古力味都保留番,童年回憶即刻返晒嚟!最正係一盒只售$18,仲有成30包,除番開每包一蚊都唔使,貫徹當年一蚊幾毫有找嘅小食部歲月!

Vincent Reporter

長頸鹿蕉

Miffy和式結婚公仔

Ragnarok Odyssey繁體中文版

McDavid護膝

童年回憶威化餅