Logitech Win 8配件逐個「觸」

近期唔少人升級至Windows 8，可惜唔係部部電腦都有篤芒，咁咪玩唔到觸控手勢？有見及此，Logitech就推出多款支援Windows 8觸控介面的配件，等大家可玩盡新系統、新手勢！

T650觸控指令好方便

無線觸控板T650驟眼睇平平無奇，其實可以做出總共14個的Win 8手勢指令，例如單指從左側滑動切換應用程式、兩指左右滑動做出水平捲動、三指向上滑動啟動Win 8開始畫面、四指向上或向下滑動將視窗最大或最小化等等，超實用！而T650特別採用平滑的玻璃表面，令手指及指尖都可以輕鬆移動，更可防刮花，又唔易黐指模；加上使用USB充電，每次充電後都可以用足一個月。

T620全觸控滑鼠

以往大家用開嘅滑鼠多數都備有左右鍵以及滾輪，而T620就一反傳統，採用全觸控設計，用指尖就可以玩手勢指令，包括可做出水平捲動、垂直捲動、切換應用程式等六種指令。而另一款新滑鼠T400則特別混合按鍵及觸控操作，皆因產品既有左右按鍵，亦於中間位置加入觸控區，水平捲動、垂直捲動等指令都一樣做到，啱晒未適應觸控玩法嘅用家啦！

鍵盤產品

K400r將無線鍵盤以及觸控板結合，十米範圍內都接收到。其3.5吋觸控板反應不俗，亦支援捲動等指令。

K810藍芽鍵盤用上鋁質物料，仲有背光功能，Windows 8、iOS及Android平台的產品都啱用。