萬馬奔騰

環保風在香港流行多時，近年連大陸都開始關注，而且甚富創意。好似馬桶咁，以為佢只是解決大家的日常需要，但原來也可以成為藝術品，說的是佛山石灣公仔陶瓷街的馬桶瀑布。佢係由成萬個收集回來的廢棄馬桶組成，款式多到數唔到之餘，仲有成5米高，長達100多米，睇落真係好壯觀，加上點點歲月痕迹，重口味得嚟又夠心思！

Boris Reporter

龍馬假期

優雅教主柯德莉夏萍主演的《羅馬假期》大家都聽過，日本人對它更有莫名的情意結，繼乾物女電影《螢之光》模仿經典劇情後，四國高知縣亦以之Crossover當地名人坂本龍馬，推出「龍馬假期」觀光推廣活動，食字之出色，連英文名都食埋，叫「Ryoma Holiday」，唯一美中不足，是廣告中扮演龍馬的男主角不是型英帥的福山雅治。

Ying Reporter

睇廣告 搵人氣之星

剛去韓國來了次楓之旅，經過數晚狂睇電視，臨尾又到首爾明洞逛了一轉，就眼見的廣告數量，得出了當下最受歡迎男女韓星誰屬。男子組最紅非PSY莫屬，打開電視又杯麵又泡菜的廣告密密播，不過最搞笑是無論Sell乜產品，到最後都係要跳番Part《江南Style》埋尾！女星方面，電視廣告最紅的不是歌手或演員，反而是韻律體操選手孫妍在，雖然倫敦奧運成績一般，但憑着甜美樣子，依然獲得眾多廣告商的垂青，看着看着，真希望奧運快點再來呢！

Chiu Reporter

匠心體驗

一直頗喜歡丹麥Georg Jensen的銀飾，發夢都估唔到可以在品牌銀匠指導下，DIY一塊GJ吊墜。細心與耐性從來不是個人強項，今趟可藉此與銀塊一併打磨，意外地竟從年輕銀匠Emil身上學到人生哲理：「冇人第一次試就識做，你好像很怕犯錯。」陌生人一語道破性格盲點！手心冒汗地切鋸半小時，終於完成畢生第一塊銀吊墜，賣相不算失禮；掛住它，令人充滿面對錯誤的勇氣。

Seine Reporter