快人一步春夏已到！

做Fashion工作確令人有點精神分裂，事關新季Fashion 潮流新品總快人一步展開宣傳，明明啱啱先開始轉涼，但已開始收到來年春季的Press Kit，有好幾個品牌更舉行了春夏季的預展。早幾日Stella McCartney便率先舉行了2013年春夏季Fashion Presentation，地點選址灣仔The Pawn天台舉行，現場擺滿鮮花、七彩繽紛的布置同氣球裝飾，加上鮮艷螢光服飾，非常養眼，最正係當日天朗氣清又涼浸浸，這幾個星期忙到爆的我，當堂成個人醒晒！

Sanna Senior Reporter

東瀛手信

近期公司有不少同事都出國遊玩（像是去完西藏的同事Ｍ），單看照片就挑起小妹出埠那條筋，縱使無遊玩機會，但收到有意思的手信已叫我開心好一陣子。上級D剛從日本回來，身為「眼線控」的我早已拜託她購入日牌VISÉE的黑色眼線，堪稱本人用過最好用的液體眼線筆！對沒畫眼線就不能出門的我來說簡直就係寶，可惜產品只在日本有售，只好每次趁朋友外遊時代購。

（P.S. 太感謝D送我的手信，本來是一小塊磚狀東西，打開後才知是一件壓縮Tee ，好有趣呀！）

Yilam Reporter

同學創業 點都要撐

回想N年前，中學雖然修讀美術，可是最終做唔成設計師，反而入咗Media呢一行，掹車邊都算是文化界。然而身邊同學大部分仍堅持做Design，不過經常呻香港Design呢行好難做，我明我明，其實我哋呢行都唔易做，總之我睇你好你睇我好。不過，最近有位同學，居然自立門戶開網上店舖，主力賣自家設計的男女婚戒， 上「面書」睇睇，嘩，原來有成30幾款，整體設計都好簡潔，同學仔話佢嘅戒指同人哋唔同，無論粗幼底部都會填滿金，即行內人講嘅「實心」，另外仲會做到「卜底」，即係內圈較厚圓，男仔戴上手就會舒服啲，價錢由幾千至幾萬元一對，非常經濟實惠。我欣賞Volumn系列其中一款，女裝鑲有一排細鑽好考工夫，但最正係個店名，叫「Heart To Finger」，由心連到手指，執子之手，與子偕老，真係好鬼浪漫。

Amy Editor

西藏潮物

相信潮人出街都總有一、兩件Accessories傍身，小記亦不例外，近日同事M放假到西藏自我挑戰時仍堅守潮流宗旨，為各位潮流組組員挑選了西藏至潮的手繩作手信！這條手繩除潮味十足外，刻在木牌上的經文「阿波咪啤咩空」（由同事M親身解說）據聞有保平安的意思！現在小記上班、出街甚至沖涼亦「繩不離身」，每日亦默念經文20次希望能藉此吸收西藏潮物的靈氣令自己一切順利，真的非常感謝同事的一番心意呢！

Alex Reporter