大力老虎

很喜歡買書的我，家中書本堆積如山，有時想抽本出來閱讀，卻常常因為書本疊成一幢，要牽一髮動全身而放棄。某天到niko and……訪攝小店精品，巧見這兩隻勤勞的老虎仔，原來是小型儲物架，心想拿幾本小說出來分開擺到架上，那就不用下下抽一本書，就搞到全幢書東歪西斜；如果把儲物架放在鞋櫃上，出門前才把書取走，就更寫意！可是一睇價錢，盛惠$211……自己捨不得敗家，最後決定作為生日禮物送人。

Ivy Reporter

快活啤酒節

一年一度的德國啤酒節就嚟完喇！仲未去的朋友，如果你想去趁吓熱鬧，飲吓啤酒，其實不一定要去Marco Polo高消費，跑馬地馬場一樣可以如你所願！小妹當日就打算和友人用$10入場感受吓熱鬧氣氛，點知行到門口，保安叔叔話：今日免費！WOW！場內人山人海十足開Party，未幾，有位推銷姐姐走過嚟話只要Like佢哋嘅Fans Page，即可換得生啤一杯！哈哈！未免太美妙了吧？現場睇埋當晚賽事，一邊估吓馬仔，一邊感受十隻馬喺你面前奔騰的震撼，呢個Free Happiness足夠我哋興奮成晚！想一齊嚟玩？萬勿錯過聽日跑馬地馬場Last Call喇！

MaryK Reporter

手砌吉蒂

話說早兩日細妹放工無鬼聊，又走去屋企樓下精品店幫襯，帶啲媽媽話嘥錢的「Cutie嘢」返歸。今次又有咩呢？就係一支Nano Block Hello Kitty筆。當晚見妹妹三兩下手勢，就將幾粒積木變咗做吉蒂，好似幾過癮咁，不過，如果要我用98蚊買嚟玩，我就唔係咁捨得啦！但對於吉蒂迷嚟講，呢支筆有得砌又有得用，幾貴都買啦！

Sammie H Reporter

沒有放棄當成功

自問零音樂感，但出奇地身邊好友全是音樂強人，連老婆也是唱得彈得之人。因此，曾經妄想學結他，但很快自己就得出「不可能學得懂」這答案而放棄了。近日在電視見人表演Ukulele（夏威夷小結他），突然「抽起條筋」又想學，然後又真的跑到旺角一間Ukulele專賣店買了一支Mahalo的Concert版本回家。不過今次學精了，目標沒有Set在識彈咩歌，而改為「1個月後還未將它雪藏」。有時沒有放棄，其實都算是成功了。

David L Reporter