花生達人至愛

現在有些人，從事某一件事多年，就會自封或被封為「達人」。而小編由細食花生食到大，三十幾年了，自封花生達人都合情合理。有「達人」銜頭，說無聊事也權威過人似的。嗱！是咁的，我不喜歡吃萬里望鹹脆花生，又細粒又乾身，寒寒酸酸彷彿很可憐；加上太鹹，剝花生最後變成開啤酒汽水，好像有點本末倒置。至於肉大粒、味溫和的紅衣花生，才是小編的「飛佛」，而目前為止吃過最好味的紅衣花生，都是在中環結志街路口那生果鐵皮檔買的，$20大大袋，足夠我剝兩三日。

Tony Editor

拼圖硬碟

我隻外置硬碟，用不夠一年，就快要爆滿了。我知，罪魁禍首是自己，發現有甚麼好似好睇的電影、劇集，就不理那麼多即時下載儲起來，到最後往往一集都未睇過，但又不捨得刪除，唯一解決方法是買多隻容量更大的硬碟。早前去開腦場，就揀了這隻ADATA HV610，貪它外形夠過癮，採用拼圖外形設計，加上純白外殼，在500GB、750GB、1TB之間，揀了容量最大的1TB，相信今年內（其實得番兩個月）都不用再為硬碟爆滿而煩惱。

Angus Reporter

新波Boot迎踢波

小記都鍾意踢波，不過一向都係踢石地場居多。近來同事籌組「一年幾乎得一度」嘅足球賽事，竟然Book到十年難得一遇嘅真草場；作為熱血分子，梗係即時去入番對真草波Boot迎戰啦！今次新入手嘅就係Nike CTR360，雖然係平價版本兼過氣款式，但勝在顏色搶眼又抵玩，絕對合乎經濟原則，一齊踢波喇喂！

Vincent Reporter

舊的唔去 新的唔來

用了三年的Mouse，之前已經間歇性失靈，直至近日終於捱唔住，完全冇反應。雖然我對嗰隻Mouse無任何感情，但都特登換了一隻形狀完全相同的Mouse，貪佢同以前一樣咁好揸手。呢隻$78的Mouse唔係咩大牌子，亦都唔算特別便宜，勝在用了搶眼的電鍍紅色，而且大大隻、好抵錫，除了Right Click、Left Click同中間個轆之外，其他掣應該好少用到，因為以前那隻都沒有。小記一直提以前，因為人總會想起那個EX，你懂的。

Jason Reporter

日製Sanrio×Nano Block

早排去台灣，搭捷運去咗西門町逛萬年大樓。話說萬年大樓係宅男聖地，而身為宅男代表嘅我梗係探吓合金Figure、動漫遊戲啦，點知畀我喺一間玩具店搵到一堆日本製Sanrio跟Nano Block聯乘的積木小玩具，除咗例牌嘅Hello Kitty外，仲有My Melody、布丁狗、Little Twin Stars等，最重要係香港暫未有得賣，加上女友鍾意My Melody，仲要係400蚊台幣抵到爛，所以小記都忍唔住買番隻嚟做手信！

Alfred Reporter