Ubi Day2012首試Wii U刺客打英軍

以前Ubisoft會參與東京遊戲展（TGS），不過近兩年無玩，寧願自己搞遊戲體驗會。上星期六Ubisoft首次喺日本東京秋葉原舉行遊戲體驗會「Ubi Day 2012」，盡晒今年推出嘅自家遊戲。毫無疑問《Assassin's Creed III》係今次試玩會主角，甚至連Wii U版本都有得試玩。另一套Wii U獨佔的期待之作《ZombiU》亦有得試玩，更要排成個半鐘，人氣爆燈！舞台活動則請來《AC3》聲優同著名演員Cosplay《AC3》主角Connor壓陣，加上一早打晒蛇餅等入場掃貨的自家產品售賣區，氣氛超熱鬧！

試玩四款年內發售遊戲

其實唔少日本遊戲廠會喺「主場」搞自家的遊戲體驗會，但來自法國的過江龍Ubisoft卻係首次「作客」，挾住《Assassin's Creed》系列、《Rabbids》系列同《Just Dance》系列咁大名氣，絕對有睇頭！今次「Ubi Day 2012」有得公開試玩嘅遊戲包括提供PS3、Xbox 360同Wii U版本的《Assassin's Creed III》、PS Vita版本《Assassin's Creed III: Lady Liberty》（香港版本名為《Assassin's Creed III: Liberation》）、彈結他遊戲《Rocksmith》同Wii U獨佔的《ZombiU》。雖然手機遊戲《Assassin's Creed: Utopia》跟射擊大作《Far Cry 3》因為製作問題未能現身，但已經好吸引！

《Assassin's Creed III》三平台開打

《Assassin's Creed III》遊戲舞台由早兩集嘅意大利同君士坦丁堡跳到18世紀美國獨立戰爭時期。今次Ubisoft更不惜工本，請來為《AC3》主角配音的人氣聲優浪川大輔以及替PSV版《Assassin's Creed III: Lady Liberty》女主角配音的聲優甲斐田裕子上台宣傳之外，仲請來日本人氣甚高的黑人演員Dante Carver Cosplay《AC3》主角Connor，他一身裝束度身訂造，全部遊戲中可用的武器都掛晒上身，連弓箭同手槍都真到喊，成套裝備據講更要成幾萬蚊美金！

新增反擊系統

講番遊戲試玩版本，無論係PS3、Xbox 360或者Wii U版都係玩第一版由波士頓茶會事件改編嘅片段，要喺兩條船之間來回殲滅不斷增援的英軍。小記一試遊戲操作，既可以在兩艘船之間跳來跳去，仲可爬上桅桿或者跳入水中攀爬上另一艘船，惟小記未能完成打低100名英軍的任務，就夠鐘被迫停玩，但係都打低八十幾人，比起現場所見多數人只能完成六、七十個為佳。比較特別係今集戰鬥系統加入即時反擊（Counter）玩法，只要計準時間隨時可反客為主，向對手使出致命一擊。

三個平台版本中，當然以新平台Wii U最受歡迎，人龍多過PS3和Xbox 360版本一倍以上，而且令人意外地係竟有唔少女性玩家。不過據現場所見，Wii U版畫面流暢度似乎稍遜於另外兩個平台。至於《Lady Liberty》雖然都係用上同時期美國背景，不過就係南部的新奧爾良，建築同氛圍都同原來《AC3》有好大分別。現場試玩版要在城內搵出接頭人抵抗西班牙軍，之後仲可捽PS Vita機背控制馬車添，至於遊戲內仲有場景會同《AC3》主角Connor合作，當然現場試玩版冇得玩啦！

《ZombiU》喪屍威到戴頭盔

至於令人萬分期待的《ZombiU》都有十個試玩台，不過排隊人數甚多，要成個半鐘先有得玩。好在記者一開門就去排隊，排一陣就得。《ZombiU》遊戲設計真係幾型，以倫敦作為打喪屍舞台，連預告片都用埋英國國歌God Save the Queen做配樂。不過更型係來自Wii U嘅新操控方法，唔止要睇住電視(目及)實幾時有喪屍撲出嚟襲擊你，仲不時要用埋Wii U GamePad上嘅屏幕睇地圖、揀武器同道具，或者要當成掃描器睇現場情況，真係要一眼關七先至掂，甚至當畀喪屍壓住或箍住時，仲要Fing GamePad甩身。

試玩版基本上都係畀玩家學習新操控方法，喪屍出現頻率唔密，不過「生命力」超強，開頭用支手槍仔開三至六槍先可打得低喪屍。而Headshot都唔係一槍搞得掂，因為遊戲入面嘅軍人同警察喪屍威到戴晒頭盔，第一槍只係打甩頭盔，第二槍中頭先打得死。手槍仔火力弱，而且子彈有限，都係拎支板球棍近距離打喪屍好過。雖然試玩時間得十分鐘左右，但喪屍實在太聰明，而且自己攻擊力弱，好多玩家都要死兩三次。

遊戲設計好特別，被喪屍咬死後，原本所控制的角色會變成喪屍，玩家「復活」後會改用新角色，要拎番之前儲落的道具同武器，就要做低已變成喪屍嘅原角色！提提大家，由於Wii U行貨主機未計劃在香港推出，Wii U獨佔的《ZombiU》未必有行貨，想玩的話就到時到候巡Game舖喇！

日本推出日期：12月8日