試做《i-D》封面主角

呢排時裝界興玩Snap Shot，繼之前介紹完Sandro引入巴黎Studio Harcourt的即影即有相機後，最近中環Joyce都擺咗部。話說Joyce最近同英國潮流雜誌《i-D》在北京舉行《Soul i-D》大型展覽兼推出新書，在香港中環新店特別設有《i-D》主題展，展出多本珍貴《i-D》舊作及代表性的封面照片。其中最好玩係設有《i-D》Cover即影即有相機攤位，免費拍攝模仿《i-D》著名大頭封面照。唔少明星名人好似Wyman、Evelyn同關楚耀已經率先試影，我當然影埋一份，不過效果唔太理想，所以決定遲吓再去影過。影完後有個貼士畀大家，身材矮小的話最好企响度影，因為個鏡頭Set得比較高，而張相要勁Close Up影出嚟至夠型同似《i-D》Cover。

如果你自問張相型爆靚爆的話，可以由即日至11月7日，將張《i-D》 Cover相片放上微博參賽，寫明#$JOYCE X SOUL i_D#和@JOYCE載思，有機會獲贈Joyce $1,000購物禮券。

Sanna Senior Reporter

尋寶行

事緣早前收到K11的公關來信，知道10月份每逢周六、日都會有手作市集，基於工作需要（加上本人超愛手作飾品），決定去尋寶看看。整個市集其實係四層商場電梯位兩旁擺設小攤檔，大部分都係本土的手作人，部分來自外國，像是荷蘭的袋子設計師和印度的金器設計師。完成工作目的，點都要支持一下本地的設計師，包括超搞笑的羊駝手帶，四肢都可以郁！另外，更試玩Henna（印度的一種非永久紋身），和繪畫的妹妹傾談下才知道她是自學的，不得不讚啊！

Yilam Reporter

韓流無法擋

韓流熱潮不是近一、兩年的事，而小記亦是中毒者之一，當知道買到千載難逢BigBang演唱會門票的一刻，就算身處Office都唔忍唔住叫咗出嚟！近日MISSHA最新推出男士產品便請來東方神起做代言人，相信各位女士們唔多唔少都會因為「韓星效應」而爭相購買！小記有幸被邀出席新產品的發布會，回家便立即試用，無他嘅，都係希望用咗之後可以變到韓星咁靚仔，天呀！求你實現我嘅願望吧！

Alex Reporter

要做潮女 不做阿珠媽

成日話香港人競爭力愈來愈低，最近走首爾一轉，原來係真㗎！講緊係國民造型。基本上，佢哋嘅衣着唔複雜唔花巧，只係整整齊齊企企理理，就非常OK。無計，當地男女平均身形修長或高大健碩，即使我去到，香港潮女都變做阿珠媽，輸晒！不過，大家唔使慌，作為潮流組成員，我做晒筆記，只要記緊以下幾個法則，過去首爾旅遊Casual得來都可以入型入格：1.上身衞衣或線衫，幾鬆身都好，下身唔露腿都一定要配窄身褲，男女適用（低襠褲、運動褲，No!）。2.腳踏簡單跑鞋一對，最好係N字出品，（籃球鞋、厚底涼鞋、似拖鞋嘅行街鞋，No!）3.背孭四方形背包（旅行袋、斜孭袋，No!No!No!只有香港人先鍾意斜孭，或者將背包孭喺前面，唔信你出街留意吓。）以上簡單幾項，已經夠用，當然最好平日鍛煉好一副靚Body，去到邊都唔怕失禮。

P.S忍唔住偷影大隻型男，係咪好得先？

Amy Editor