星戰×adidas苦等兩年無慮入手

同事愛買鞋，小記亦唔例外，但就只Buy潮款。兩年前看過這對「Star Wars×adidas Originals」的Top Ten Low，心動不已，奈何家貧買不起。直至一周前在Yahoo拍賣網見到，立刻無慮入手。

這對鞋最可愛之處是以星戰中的機械人拍檔R2-D2及C-3PO為藍本，將鞋身分為左右兩邊，一邊是代表R2-D2的白，並配上銀、藍交錯的三間標誌；另一邊則係全金色，浮誇到爆，一看就知代表C-3PO。留意兩隻鞋的鞋舌位都印有機械人嘜頭，單係呢點已值回票價。惟始終係兩年前的出品，鞋面難免有少許舊化，看來要買個專用防潮箱「供奉」才行。

Gilbert Reporter

忙裏偷閒食個包

小記食無定時都唔係第一日嘅事，由於下午茶餐夠晒平，用佢嚟代替正餐都好正常。今次就走到「露脾星期幾」食佢個「雙堡薯片餐」，雖然話平唔平，都要成五十大洋，不過兩個包又有雞又有牛，肉質仲鬼咁Juicy，又幾鬼抵食喎！衰鬼！

Michael Reporter

「假」薯條

你估圖中係咩小食？仲問，好明顯係薯條啦！其實只係答啱咗一半，實情佢係榴槤薯條（Durian French Fries），即係用榴槤整嘅「假」薯條。我曾經嘗試逼自己食榴槤，抵得住果王嘅濃烈氣味，但果肉的特殊質感就徹底擊倒我。而呢樽榴槤薯條除咗保留少量「果香」外，令人難耐的果肉質感就蕩然無存，跟袋裝薯條無乜分別，食完一條又一條，算係克服咗一個小小的心理障礙。邊度搵到佢？曼谷廊曼機場，即係依家畀AirAsia近乎獨攬的廉航機場，店員仲話係新品落力Sell，129泰銖一樽，即$30港紙左右。

Brian Reporter

炒Lego人

由細到大都唔多鍾意模型車、高達、Figure呢啲Kidult最愛，不過早排喺朋友影響之下，竟然走咗去買Lego Minifigures；初頭見啲人仔造型多多，又白兔、又聖誕老人，仲要只係幾十蚊一隻，所以就貪玩買咗幾隻。後尾先知，原來呢啲Lego人仔部分好似Batman系列係有炒價，成一百蚊一隻。小記依家得閒見到靚款就會買番一兩隻，不過最沉迷都係我個老友，之前就買咗一副價值超過二千蚊嘅Lego London Bridge，仲一得閒就去油麻地某商場「收購」人仔添！

Vincent Reporter

有「壓力」係好事

近年體育界興起穿着Compression Wear比賽，即壓力衣物也；基本上任何運動都合用，衫、褲、手袖、襪乜都有，務求保護肌肉以免拉傷，發力勁啲，又可促進血液循環，抽筋都頂得住冇有怕；休息時穿着更可減少乳酸積聚，有助復原。小編近年都穿着Compression Wear做運動，保護小腿的Calf Sleeve是「基本裝備」，如果踢波或跑長距離的話，大腿也穿上Quad Sleeve。家陣如「三間」等大牌子都出Compression Wear，小編個人就喜歡瑞士的Compressport以及澳洲的2XU出品，最近就去補貨買多對Calf Sleeve同Quad Sleeve，究竟所費何幾？就當買咗條靚靚哋有牌子嘅牛仔褲吧。

Tony Editor