不可能的潮物Polaroid SX70 & IMPOSSIBLE PX70 by NIGO

有錢人嗜好係可以理解，好似Bape主腦Nigo咁，主理多個潮流品牌之餘，閒時更愛玩跑車手錶玩具古董。早前手痕嘅佢更將已停產的Polaroid首部單鏡反光即影即有相機SX70「復活」，以招牌迷彩圖案重新設計包裝，連同特別版相紙售價69,800日圓並全球限定108套，立刻令這部老爺級相機備受注目，連鎖反應下連帶普通版SX70都多人玩咗。鍾意影相的友人M就是其中一位，上eBay Bid部返嚟之餘仲特登「襯埋」IMPOSSIBLE PX70 by Nigo限量版相紙，10款顏色相框隨機出現，當中黑白兩色更有「R」字樣，但唔知係友人攝影技術有待改進，還是相紙穩定性問題，友人於戶外環境兼陽光普照下為小弟拍攝出來的照片全部「有框無樣」！是次經歷話畀我知，潮流與實用通常都唔可以共存。

Pasu Reporter

愛刨 I.T Post

資訊性的時裝雜誌是每個時裝精的精神食糧，每季至少花數千元，而厚厚的I.T Post時裝季刊早已佔據了我書架上的重要位置，無他嘅，$99足本放送最新一季大品牌情報，加上一頁頁玩視覺效果的影像，值回票價。今季的「Young@Heart」主題，將時裝、文字和影像互融，畀人自己慢慢從時裝裏面，領悟出保持心境年輕的重要性。

Candy Reporter

明星反效應

明星效應是市場學入面老掉牙的遊戲規則。橋雖然唔怕舊，但最怕就係唔受。近幾季收到的鞋履連鎖店新聞稿，見過Sammi × Skechers，雖有天后襯托，但仍難起死回生；比較欣賞的是Staccato × Fiona系列，款靚之餘，Stylist又有眼光，令Fiona的甜姐兒形象非常突出。最近又收到Millie's × Hocc系列資料，可憐我的偶像一向走中性型格路線，但為迎合品牌的女人形象而穿上收身皮褸，強要裝女人味，又要穿Loafer 突出絕不修長的美腿，小記只能暗自慨嘆：成分Leaflet只有封面見得吓人，起碼都叫型，其他就……

Moe Reporter

披搭的季節來了！

天文台預測嚟緊嘅周末天氣開始轉涼，小記差點興奮到要開香檳慶祝。點解？對於我這種怕熱又大汗的人，夏天只會穿Tee短褲出門。悶都無辦法，這就是天生大汗的宿命。秋天來臨，小記終於可以「着多件衫」，迎接Layering的季節。昨晚整理衣櫃時，發現自己買落不少圍巾（相片只是其中一部分），不少已被閒置多年，或者今個秋冬，正是它們重見天日之時！

Keith Reporter