「Gangnam Style」反上身

泰國夜市賣T恤的檔攤不難發現大大個土產啤酒Logo的T恤，亦有好多惡搞快餐店麥叔叔嘅二次創作Tee。早前去泰國一轉就發現有新搞作，仲追得好貼世界潮流添！所講當然係韓國大叔PSY嘅「Gangnam Style」騎馬舞，到底係搞笑抑或反智都好，總之呢股騎呢風早就由首爾江南區吹到全世界，喺清邁夜市就見到呢件印住黑超大叔PSY嘅「No Gangnam Style」T恤，有黑色同白色兩款任揀，最平220泰銖就買到，計落都唔使$60，趕潮流買件嚟着吓都OKo架！

Brian Reporter

靚女版「救參」

星期六無節目，係時候去影碟舖掃碟。今次買了隻《失蹤少女名單》，其實台前幕後都不算出名，女主角做過《潛逃時空》，屬傳統金髮大眼靚女，導演希特達尼亞，算小記孤陋寡聞，真是聽都未聽過，之所以揀佢，全因店員落晒嘴頭，原文實錄如下：「哇！呢套嘢真係勁好睇，有無睇過《救參96小時》？佢咪係靚女版救參囉！」小記見佢如此落力，就買回家看過究竟，評語是：主題都係圍繞救參，不過就由《救》片的過氣特工阿爸變成金髮大眼家姐，動作無《救》片咁激，但多咗啲懸疑同驚慄，都算好睇，叫做唔使搵嗰位店員算帳！

Angus Reporter

德製懷舊框

鍾情手製眼鏡框的朋友，大多數會揀o架仔貨，好似老牌泰八郎、小竹長兵衞以至新興嘅Effector都係唔錯嘅選擇。不過千祈唔好以為歐洲貨就冇好嘢，小記之前去柏林公幹，順道行吓Flea Market，竟然搵到副德國MEITZNER Atlanta懷舊眼鏡框，雖然唔似得日牌咁用「賽璐珞」作物料，亦冇用上「一之蕊」嘅傳統製法；但勝在支架硬淨，仲有「五枚蝶番」嘅鉸位，手工一啲都唔輸蝕。最難以抗拒嘅係價錢，新貨要二千幾蚊，二手價一折有交易，就算拎番香港配埋鏡片都仲係好划算，唯一可惜就係少咗個原裝眼鏡袋囉！

Vincent Reporter

能量飲品DIY

小編多年前戒煙兼玩長跑，東施效顰扮健康，惟歲月催人，年紀愈大，時間愈慢。想當年不用食Power Gel跑21公里都好輕鬆，現在跑長少少就要食Gel食糖飲乜飲物補充體力。早前朋友話食Power Gel好燥熱，不喝水的話，成口漿又好難吞，於是推薦本人去銅鑼灣步風體育用品店或天后維記體育用品買圖中這款水溶片沖水飲，一筒$98有20片，掉落500至750毫升清水「Saaaaa」一輪就飲得，除番勻比坊間現成能量飲品平，亦比較少糖分，跑完10公里飲大概500毫升已經好解渴，似乎得得哋喎！

Tony Editor

影唔到星都有餐食

小記平時都有上山影星嘅嗜好，影星呢項活動話難唔難，不過整體嚟講只可以用四個字形容─「望天打卦」！天氣唔好嗰時都真係幾頭痕，仲浪費咗上山嘅一番氣力！好彩小記去開影星嘅梅縣陰那山，有極好食嘅叉燒包同炒米粉，十元八塊，一啲都唔貴。不過咁又產生咗另外一個問題喇，我返到香港食唔番點算呀！

Michael Reporter