尖銳奸角邪動王韋伯斯
儲開Megahouse Variable Action《魔動王》系列嘅玩家，以為買齊三部「光之魔動王」就可以鳴金收兵？說時遲、那時快，敵對陣營嘅邪動王韋伯斯已經啱啱上架，跟足動畫設定做到三段變形外，亦繼承咗該廠嘅優良傳統，就係金屬塗裝準確均勻，奸角都咁做得有型，相信魔動王嘅忠心粉絲又要甘心掏腰包。
金屬塗裝交足貨
雖然Variable Action系列統統都係100%塑膠製品，不過都能夠企硬 「合金價」，仲要賣斷市，關鍵在於金屬塗裝實在出色，韋伯斯嘅肩、腕、腿及裙甲，都採用 「銀底藍」 做出閃亮質感；心口跟額頭嘅碧玉部分，喺光線直射下仲有微微嘅漸變效果，係驚喜所在。不過有讚亦有彈，變成雙頭龍嘅雙腿部分，佢嘅紅色龍角配件過於尖銳，小心拮損手之餘，亦要慎防整斷。可動性方面，髖關節夠實淨，下盤堅挺，至於連接肩膊嘅延伸Ball Joint，就可增加舉臂幅度，原本設計唔錯，可惜唔多受力，揸劍時嚴重 「不舉」 ，想擺有型嘅必殺技甫士？高度考驗閣下嘅耐性囉！
變身雖易切忌大意
之前三款光之魔動王都可以變成頭像，韋伯斯都唔例外，仲可以變多一瓣——野獸模式嘅雙頭龍，造型夠霸氣，而且整個變身流程亦簡單直接，先將韋伯斯上下倒轉，再將頭部縮入頸位，然後伸開腕甲並扭向內側，就會變成龍爪，最後回轉髖關節，再將後腳掌扳下變成龍頭，之後調整埋飛翼角度就成事。至於「頭像模式」嘅變法，就跟之前三款魔動王大同小異，都係反腳、縮手，再拉出上身胸甲，不過頭像面相嘅鉸位比較實淨，拉出時要畀多少少力，仲要提防刮甩油，切記！
查詢：2148 9483 （精品）
Megahouse Variable Action《魔動王》邪動王韋伯斯 售價：$568
只需寥寥幾個步驟就變到頭像形態，造型亦跟足動畫設定。
除咗頭像，韋伯斯仲可以變成雙頭龍，夠晒邪氣。
前後腳掌合埋，就可變成龍頭，而且內藏發射口，設計夠仔細。
手肘有雙重關節，如果要轉動手腕，先要將前臂外甲向前拉出。
邪動劍嘅劍身與劍柄採用分件式設計，可以減少刮甩油嘅風險。
尾部嘅每一節都可獨立扭動，飛翼又有三組關節，增加可玩性。
腳底暗藏貼心裝置，向後扳時可以扣實背部穩定造型。
膊頭Ball Joint超短，無論變成頭像形態，或者機械人舉劍時都顯得唔多夠力。