on.cc 東方互動主頁

瘦身月光機Canon PowerShot G15

近排唔少人都會去主題公園畀萬聖節啲鬼嚇吓先安樂，畀得錢入場又點可以唔影相呢？不過夜晚黑影相，出來相片多數又朦又震，如果用大光圈DC，就可以減少呢類問題，好似Canon PowerShot G15有齊F1.8大光圈同超高感光度，專門應付冇咩光的環境，咁就唔怕張張相都鬼影滿布，猶如靈異照啦！

F1.8大光圈加持

備受追捧的Canon PowerShot G系列新機G15特別配備F1.8~2.8大光圈鏡頭，明顯針對夜景或室內環境拍攝，正式加入大光圈DC的行列。雖然鏡頭的光圈變大，但焦距依然不變，沿用上代G12實用的28~140mm五倍光學變焦，而且鏡頭仲有四級IS防震支援，咁就唔怕手震，確保相片清晰銳利。如果現場真係太過黑，不妨用埋改良過的機械式閃光燈，惟需要用家手動彈出；講到閃燈，G15貴為旗艦Prosumer機，當然唔少得插外置閃光燈的熱靴位啦！此外，今次G15的機身表面特別用上磨沙塗裝，手感一流，單手持機都冇咁易甩手。

刪除扭芒設計

對比上代G12，G15的厚度顯著削減，由48.3mm瘦身至40.1mm，讓機身沒有磚頭般的感覺；皆因G15刪除了扭芒設計，返璞歸真採用固定式屏幕，雖然取景角度冇以前咁大，但係屏幕的尺寸拉大至3吋92萬像素，取景同重播更為清楚，最重要係成功瘦身之後，終於可以收藏在衫袋或褲袋。至於機頂的轉盤亦由以往的三個縮減至兩個，把感光度轉盤完全刪除，而雙層轉盤的擺位改為前後重疊排列，讓食指和拇指可前後操控，用作調校拍攝參數的前後轉盤亦得以保留，大大提升操作效率，而且機背還設有獨立拍片鍵，跟單反的操作大同小異。

10fps高速連拍

G15破天荒捨棄了歷代採用的CCD感光元件，改用了全新1,210萬像素CMOS及DIGIC 5影像處理器，不但令最高感光度達到ISO 12,800，而且仲可以拍1,080p全高清影片，最令人喜出望外的是其高速連拍能達到每秒10張，以大光圈DC來說，擁有如此高速實在鮮見。G15的對焦表現亦明顯改良，遠攝端的合焦時間僅需要0.25s，並內置了雙軸電子水平儀，準確偵測相機的水平位置。為了配合新機，廠方亦一併推出多款專用配件，例如可於40米水深使用的WP-DC48專用防水殼，可大玩水底攝影；還有能夠接駁遠攝鏡的LA-DC58L轉接環，以擴充鏡頭的遠攝能力，令G15可以有更多玩法。