型格黑白快相

一般黑白證件快相都是一大盞閃光燈「打爆」塊面，但求個樣影得清楚惜美感欠奉。最近香港出現一部豪華靚版黑白快相機，就是法國時裝品牌Sandro為慶祝亞洲首間專門店開幕，特別引入鼎鼎大名的法國Studio Harcourt拍照亭。Studio Harcourt有幾巴閉？佢係由Lacroix兄弟於1914年成立，以拍攝懷舊華麗巨星風範的黑白照聞名，多年來超過550,000名人包括Karl Lagerfeld、Brigitte Bardot同Marion Cotillard等出現於鏡頭下。今時今日，去佢影樓影一張黑白照高達二萬港元！

呢個即影即有版黑白快相機，顧客只需付出港幣100元，或購買任何產品便可免費在Studio Harcourt拍照亭拍一張黑白相。我之前襯Sandro Shop Opening就即刻試玩過，影出來效果非常唔錯好有懷舊Feel，相片仲有兩款Printout選擇。部拍照亭只擺放到11月30日，想影張黑白靚相要快手。

Sanna Senior Reporter

洋溢法國夢幻般的妝物

在法國專門出美味Macaron的糕點老店ladurée在今年年初於日本推出限定化妝品，充滿法國宮廷式的華麗包裝立即融掉我！有幸尋得身在日本的友人幫手購入，無論是蛋形的胭脂，還是各種眼影組合，統統都想入手，但奈何「彈藥」有限，加上漂亮的東西特別貴。最後帶回來的就只有蛋形胭脂和限量發售的五色眼影組合，（這樣就燒掉我一張金色的牛牛！）有朋友話咁貴好似唔係好抵，但我就話「一分錢一分貨」，顯色度夠高之餘，隱約散發淡淡花香，令我最Surprise係附送嘅Base Sample，日本友人一試就讚到天上有地下無，試過就知好貼好薄，最最最緊要係遮瑕度不俗，毛孔瞬間Disappear，Bravo！下個目標就係佢！

Yilam Reporter

I Love My Team！

2012年秋冬adidas originals以「all originals represent」展開全球新企劃「Crew Love」，跟大家分享團隊間的精神。早排跟同事一起獲邀出席盛大的Crew Love Party就完全感受到品牌的魅力，當日Party High到爆，不同歌手的演出令大家聽出耳油，而陳奕迅壓軸出場亦令全場進入瘋狂狀態，但聽歌還是其次（雖然Shine出場唱《燕尾蝶》時小記興奮到差啲暈低），最高興還是跟同事們開開心心玩了一個晚上，要知道記者工作經常要四出借衫影相出席活動，很難得才有機會聚在一起說說笑笑。所以很想在此跟隊員們說一聲：「Love You All！好開心可以同你哋一齊做嘢呀！」

（＊編按：Me Too！）

Alex Reporter

Psy至潮Fashion Icon ?

無錯，又係呢位肥阿叔，冇計，因為佢實在太紅。一首《江南Style》紅遍全球，相信佢自己都估唔到。有人認為佢騎呢搞笑，但我就話佢非常認真，起碼拍MV時的衣着絕對一絲不苟，作為時裝精當然一眼就望得出，其中一件白恤衫是出自西太后手筆，至於那副圓框眼鏡則是Thierry Lasry的出品。唔知點解好似中咗佢嘅毒，日日返屋企都要上網搵佢嘅消息睇吓，好似早排就喺yesasia.com網站搜刮到佢嘅Cute版公仔Tee，價錢唔係貴，約港幣300幾蚊，買嚟笑吓開心吓，着住再跳番Part騎馬舞，相信人都會開心啲。

Amy Editor