提速Apps

身邊朋友話佢個台4G上網好快喎，但係拎嚟一睇，同我部手機嘅3G上網差唔多啫！無謂爭拗，用個Speed Test程式即場比過就知邊個贏！iOS平台上除咗有好多Speed Test程式之外，仲有唔少Apps都可幫大家部手機睇網頁睇得更快，行Apps時行得更快，甚至可以快速轉換屏幕亮度，唔一定要新機才可享受到「快」嘅感覺。

《Speedtest.net Mobile Speed Test》實時碼錶顯示

想試一試4G上網會快3G幾多，好多人都識用Speed Test程式去測試，睇見啲數字不斷向上升就好興奮。如論介面清晰又易用，以呢個Speed Test程式《Speedtest.net》最好，除了數字之外，仲有埋實時顯示的碼錶，可以圖文並茂咁顯示PING Time、下載速度同上載速度，亦可入Settings揀選不同Server作測試，而且每次測試的結果都會記錄在案，幾時想對比番之前的紀錄都得！

下載費用：免費

《Hardest Game Ever-0.02s》高速反應

0.02秒即係有幾快？人哋話眨眼咁快，其實眨一下眼都要0.1秒咁「耐」。這款自稱為最難玩的iOS遊戲《Hardest Game Ever-0.02s》，難度在於要思考快同反應快。由《0.03 Seconds》幕後班底製作，遊戲有八版，並各有三個迷你挑戰，在極度有限的限時內完成挑戰，而且反應時間的間隔由之前的0.03秒再縮至0.02秒，可以話用盡iPhone嘅計時能力，只要稍為猶豫一個眨眼時間，就會挑戰失敗，大家又有冇信心挑戰呢？

下載費用：免費；完全版$8

《Mercury Browser》最快瀏覽器

上網睇網頁想快啲，除咗同手機網絡供應商或者Wi-Fi連線速度有關外，瀏覽器都要夠快先得。iPhone預設已有Safari瀏覽器，但唔少用家都覺得佢未算快，咁嘅情況可下載自稱為iOS最快網頁瀏覽器的《Mercury Browser》，最新版本已去到7.0。實試時確實較Safari略快，而且有較多功能，例如有11種預設布景主題，又最多可以開啟十個TAB分頁，亦可以全屏幕瀏覽網頁，同可Sync埋Chrome同Firefox嘅Bookmark添。

下載費用：免費

《記憶體100%》釋放空間提速

手機愈行愈慢，每年換部新iPhone都無補於事，皆因好多時慢係因為大家同時間開咗好多Apps，而唔記得或唔識停用閒置程式，既嘥電又會拖慢手機行Apps時的速度。只要用呢個《記憶體100%》App就可以幫大家清理停用嘅程式同釋放記憶空間，更可透過系統進程監視器，詳細睇清楚邊啲程式係可用、活躍、非活躍或者同其他程式有關聯的程式，令iPhone回復當初出機時咁嘅反應速度。想試用嘅話大可下載免費版，如果嫌彈出Banner阻住，買個專業版都只係$8。

下載費用：免費；專業版$8

《通訊事務管理局辦公室寬頻表現測試》中英介面並用

講到官方認可的Speed Test程式，就首推《通訊事務管理局辦公室寬頻表現測試》。此App由通訊事務管理局（OFCA）推出，想快捷上App Store搜尋的話，打「OFCA」或者「通訊辦」都得。功能方面，都係基本套餐，如測試PING Time、下載速度同上載速度，但就得純文字跟數字顯示，並無指針、碼錶等圖示，望落去未夠吸引；不過講得係官方程式，會照顧到各方面人士嘅需要，所以可切換到繁簡中文及英文顯示，世界大同！

下載費用：免費

《Quick Brightness》快手開燈熄燈

唔想高追iPhone 5，本身部iPhone 4電池又步向末期，所以要調暗屏幕亮度嚟慳電；但問題來了，有時玩Game或者睇相、睇片時，屏幕唔夠光睇到眼都盲，次次要去Setting揀屏幕亮度又費時失事。用容量極細嘅《Quick Brightness》App就可解決問題，只要在App內揀選自選最光值同最暗值，然後再開啟要用的應用程式，可直接按畫面上的QBright Icon開燈熄燈，一撳就可切換自定的最光及最暗亮度，確係實用。

下載費用：$8