SR大獸神型格新Look
「Go！Go！Power Ranger」，當年《恐龍戰隊》食正《侏羅紀公園》條水，由日本紅到美國，再被美國片商翻拍鬼佬版，名副其實威盡番邦！最新推出的SR超合金大獸神，大隻造型跟足當年設計，可動性就跑贏當年嘅合體玩具幾條街，隨盒跟埋額頭射死光，以及恐龍劍雷光斬等特效組件，老實講，仲型過劇中嘅必殺技場面。
扭得之人擺甫冇難度
由暴龍、翼手龍、長毛象、三觭龍及劍齒虎合體而成嘅大獸神，成個機械版大隻佬咁款，難怪深受美國人歡迎。雖然SR超合金版本冇咗合體呢一招，但係論造型美及可玩性，講得上係有史以來最出色嘅大獸神商品，當中胸甲及小腿採用Die-cast製成，硬淨之餘，接地性又高，而且唔好睇佢造型笨重，其實仲好扭過美斯。事關膊頭用咗延伸關節、肩甲及前腕又有獨立關節，可以令雙臂自然伸前，做出斬擊動作，至於腳前掌又可以上下屈曲，連壓腿動作都擺到，最正係腰位內藏拉出式關節，額外增加上下拗腰幅度，想擺彎身直劈等大動作甫士？Easy Job啦！
特效組件斬得出位
武器方面，只有背部大炮、「恐龍劍─天號神角」及「瑪莫斯盾」，Gimmick反而落喺多種特效，擺必殺技甫士時就更加入戲，好似套喺恐龍劍上模擬雷電圍繞嘅雷光斬組件，唔使加燈、又唔使用Photoshop，就可重現絕招「超傳說雷光斬」；另一絕招「大獸神光束」都做到，就係喺額頭加裝紅藍交錯嘅電擊光線組件，形神俱似。至於背部大炮備有雙Ball Joint，用嚟調整炮口角度，只要拉到膊頭，就可做出發射姿勢。可惜吝嗇造型手掌，只有握物及開掌兩種選擇，加上連簡單到痹嘅「Dino Tank」都變唔到，稍欠耐玩性。
查詢：2433 1828（瑞華行）
SR Gokin恐龍戰隊大獸神 建議零售價：$499
膊頭設有延伸關節，肩甲亦可以獨立郁動，加上前腕可以獨立再向內屈曲，上臂又有雙重關節，令雙臂做到活動自如。
恐龍劍套上雷光斬特效，再彎身向下怒斬，就係「超傳說雷光斬」嘅收招甫士。
背部孖炮內藏雙Ball Joint，可以輕易拉上膊頭，擺出發射姿勢。
腰位內藏拉出式關節，增加腰腹之間嘅屈曲幅度。
喺額頭插上紅藍光束特效組件，就能重現絕招「大獸神光束」。
瑪莫斯盾嘅間紋毫無甩油出界，塗裝QC高水準。
腳前掌備有可動關節，可惜並非合金製成，否則接地性就做到無懈可擊。
配件噱頭集中喺透明雷擊特效組件上，造型手掌實在唔夠喉。
當年恐龍戰隊威到花旗國，仲拍埋鬼佬版本，成為唔少80後及90後美國人嘅集體回憶。