怪醫出診ZCWO 1/6 Black Jack
他，擁有一張黑白分明的臉；他，終年身穿黑披風，內藏不同款式的手術刀；他，醫術高明但沉默寡言；他是無牌執業的外科聖手，也是日本漫畫巨匠手塚治虫的筆下經典—怪醫秦博士。當別家玩具商都以漫畫版作藍本時，偏偏本地人偶廠商ZCWO參考了OVA造型，為各位狂迷炮製出造型更成熟、配件更精美的秦博士，盛惠「診金」$1,160。
精心打造雙眸神采
Medicom和Hot Toys兩間大廠都先後出過《怪醫秦博士》，但兩者均取材自漫畫造型，角色較年輕，卡通味太重，化身為1/6 Figure後，感覺有點怪。今次ZCWO就改用OVA版本，比漫畫版真人化得多，並且歷經八個月時間製作，頭雕在韓籍頭雕師IMINIME Rainman的刀下，五官、輪廓都準確無誤，尤其是雙眼經過八重工序，例如移印和光油處理，在燈光下眼珠呈現晶瑩感覺，並非一般塗裝了事；植皮、頭髮則由台灣高手GuGu Chris上色，顏色甚有立體感，絲毫沒有出界，論質素絕對不比日本品牌遜色。
佩佩將不日推出
黑色偵探裝是秦博士的指定Outlook，呢方面Figure跟到足，大褸、馬革背心、白恤衫到皮鞋，以至皮帶全部Tailer-made，貼身不臃腫，唯一缺點是大褸膊頭位太窄，若然闊一點的話，穿着時會方便得多。Body方面，關節超過15個，上、下臂更可對摺，靈活性頗高，但要留意頸關節太軟，頭部較易下垂，同時手部膚色跟Body顏色有太大反差，唔想咁突兀，惟有雙手插袋。配件方面，手術刀、鉸剪、針筒和聽筒當然唔少得，最正係送埋紅酒及雪茄，做完手術可以Relax一下。據ZCWO表示，「太太」佩佩和死敵切木醫生正在趕工中，想儲齊一套就要畀啲耐性了。
查詢︰2398 7654（Station駅）
全高29cm，頭雕跟Body夠晒Fit，唔會頭大身細。零售價︰$1,160
大褸混合了兩種布料，可惜內籠冇袋仔，擺唔到手術刀。
西裝度身訂造，留意鐵線絲帶更可扭成不同造型。
皮鞋太膠，另外鞋扣用金屬製會更好。
身為醫生，聽筒當然唔少得。
植皮塗裝夠自然，眼珠在多層塗裝後，呈現真人般的晶瑩感覺。
官方不諱言髮型經過反覆測試，先做到自然又有層次感。
港劇啲醫生成日隊酒，秦博士都有紅酒同雪茄，酒樽更貼有「拉菲」招紙。
皮篋內藏手術刀、鉸剪和針筒，全部比例準確又精細，不過玩時小心唔見！
五隻造型手掌不設拳頭款，而且膚色跟Body唔太夾，仲有改善空間。
正方形地台貼有金屬牌頭，並非見慣見熟的橢圓形膠板 。
包裝盒貫徹黑色風格，表面印有燙金日本字，落足心機。