看出一點真要成二千蚊

以前細個返學，去眼鏡舖配嗰啲叫做學生鏡，二、三百蚊架連鏡真係好鬼抵。依家個人大咗，虛榮心重咗，學生鏡啲款再睇唔上眼，下下都話要有牌子先買得落手，再加上近排坐小記斜對面嗰位有米編輯一擲三千幾蚊配副眼鏡，所以小記都唔可以落後，配番副新眼鏡抗衡一下。呢副鏡黑框襯格仔臂，低調得嚟又夠型。為咗看出一點真，小記就使咗二千蚊。

Michael Reporter

尋寶搵得真 只係四十蚊

我就係隔籬段文所說的那位編輯了。配副似人樣少少嘅眼鏡，無非係想睇得真；上星期去花園街專買日韓舊衫嘅舖頭尋吓寶，一搵，正！呢件係adidas於90年代初出品嘅球證衫，1990年意大利世界盃一眾黑衣判官穿着嘅款式，由日本貴夾唔抵嘅體育品牌Descente代工，最重要係只售$40！嗱！小編唔係有米，只係有眼光而已！

又話說，其實本人有鋪古着癮，舊波衫尤其儲得興奮；十幾年前有過一件同款嘅短袖，後來因「莫財」而轉售套現，估唔到今時今日又有緣遇上呢款球證衫。

Tony Editor

買Xbox迎接新球季

作為一個典型運動迷，除咗得閒去打籃球同踢吓波之外，運動遊戲都係「賣飛佛」。適逢本月籃球、足球嘅年度大作《FIFA 13》、《NBA 2K13》相繼推出，點知屋企部把鬼Xbox竟然同我壞碟盤！既然又過咗保養期，Xbox機價都唔算貴，小記索性換部新機；最正係同事甲幫我電話格價兼留貨，唔使千五大元就有部黑色4GB主機，抵玩啦！

Vincent Reporter

人生首個尿袋

4G制式推出，可惜部部4G手機都係食電怪，莫講話睇片聽歌，淨係講幾個電話同玩陣WhatsApp，唔夠半日就Certified；身為科技版記者但最後冇電話用，反智到爆！有見及此，小記日前終於去咗三禾電氣購入人生首個「尿袋」。所謂「尿袋」，正名應該係手機後備電池，呢款Sayno KBC-L2B白晳無瑕、嬌小玲瓏，只有半隻手掌咁大，外觀已比好多對手「靚女」得多，最重要係內涵高達5,000mAh，叉爆兩次iPhone綽綽有餘。贖身價$520，抵畀！

Gilbert Reporter

定番「機戰」再臨

唔好誤會，筆者所講嘅「機戰」並非《Super Robot War》，而係最近推出嘅跨代高達戰棋作品《G-Generation Overworld》。日系遊戲本人由細煲到大，對戰棋戰略遊戲情有獨鍾。中學時代就算無錢買PS，仍會用模擬器來玩買番嚟嘅「老番碟」。而當中一款玩唔停手嘅遊戲就係《G-Generation》系列，因可以享受「砌」盡所有高達樂趣。不過自《G-Gen F》之後，作品數目有減無加。貴為「定番」之作，今次除收錄61款作品外，連睽違嘅外傳作品《G Unit》都有得玩，對筆者嚟講直頭係恩物，仲要唔使四舊水有交易，速速磅啦！

Alfred Reporter