日本直擊《MGR》vs《MH4》兩大遊戲埋身劈
想知一隻遊戲有幾受歡迎,可以從排隊人數搵答案,無得呃人。今年東京遊戲展(TGS)有兩隻遊戲嘅排隊人數比其他多幾倍,要排一粒鐘試玩都冇人投訴!其一係唔理邊個平台推出都有一大班玩家的「芒亨」系列N3DS《Monster Hunter 4》,另一隻係PS3嘅《Metal Gear Rising Revengeance》,勝在可以觸發短暫Bullet Time、校靚角度先落刀劈,爽!
《Metal Gear Rising Revengeance》斬人美學
今年嘅TGS,終於都有得即場試玩《Metal Gear Rising Revengeance》,Konami一次過擺出50部試玩機,但一樣要排一粒鐘先有得玩,玩之前仲要睇試片同聽一輪講解先可以實戰。試玩版主要畀大家學習操作,好似點樣控制主角雷電衝前,同點樣劈人,而最特別係就快斬死敵人前進入嘅「斬擊模式」,要喺一段短暫嘅慢動作時間裏校啱落刀方向,將敵人劈開,難怪遊戲宣傳都用上「斬的體驗」作標題。劈得應的話,仲可以從敵人身體抽出自我修復裝置補充體力,都幾過癮,但稍嫌試玩版冇標血場面,而且畀兩隻大型Cyborg圍攻時都幾難甩身。排咁耐隊試玩,當然有紀念品,包括有大型遊戲Folder同貼紙,都幾精美o架!
類型:動作
平台:PS3
推出日期:2013年2月21日
《Monster Hunter 4》放蟲打怪
《Monster Hunter 4》係全TGS提供最多試玩機嘅遊戲,Capcom特大試玩區入面有近100部N3DS同N3DS LL,以四部機一組,組隊獵魔。每組都有位個「芒亨」靚女教大家玩,玩家每次限玩15分鐘,但由於排隊人數眾多,都要排成粒鐘。今次N3DS版一定要試3D顯示,畫面比想像中靚;當然亦要試埋新武器「操蟲棍」,舞起嚟有啲似日本嘅太刀,可以橫斬,另可用來借力喺原地起跳,亦可以使出「操蟲」特殊動力,向目標發射及收回獵蟲,效果有啲似之前支狩獵笛,有新意。今集唔止可以喺地面劈,仲可以跳上龍類的背脊上搏鬥,睇準時間,善用地形就有機會跳上魔物身上,不過呢個動作其實唔容易掌握囉!
類型:動作
平台:N3DS
推出日期:2013年春
其他焦點新PS3遊戲
《God of War: Ascension》
去番初代之前嘅世界,Kratos要報妻兒之仇,搵Ares算賬,其動作表現同血腥殘忍程度皆足本。
類型:動作
推出日期:2013年3月
《Injustice: Gods Among Us》
蝙蝠俠、超人、閃電俠都可以使出自家絕技對打,動作細緻,招式有趣,話晒係由《Mortal Kombat》團隊操刀,令人有信心。
類型:格鬥
推出日期:2013年4月
《人中之龍5 實踐者》
主角加到五位,甚至連少女澤村遙都有獨立故事玩。有趣係每個角色都新增熱血動作,使出時全身着晒火,例如桐生一馬會變得好狂野。
類型:動作
推出日期:12月
《Metal Gear Rising Revengeance》
進入「斬擊模式」後可慢動作揀啱位先劈!
全黑MGR女真係幾型,仲可以即場預訂「斬」字Tee添!
試玩版主要畀玩家練習操作,主角雷電不時會從耳機收到最新任務提示。
《Monster Hunter 4》
今次試玩版引入新武器「操蟲棍」,增強跳躍能力外,亦可放蟲攻擊。
現場試玩版有高中低級三個任務任揀,3D效果也十分突出。
《God of War: Ascension》
《Injustice: Gods Among Us》
《人中之龍5 實踐者》