食、再食、三食杧果糯米飯！

剛剛去泰國打個轉，陽光與海灘之外，梗係要歎泰式美食，個人認為泰國的美食仲多過香港！而能夠令我翻兜再翻兜的，竟然係一碟又一碟的杧果糯米飯。因為泰國杧果糯米飯所用的杧果完全唔酸，甜度適中，仲要成個切件上，一啖一件很容易入口，而奧妙之處是那團人手搓揉的糯米飯，配上濃郁的椰汁，口感幼滑連綿，味道甜而不膩。筆者之所以能夠一口氣食上三碟，其一是分量不多，其二是堅好食，至少好食過港式。其實杧果糯米飯在泰國唔難搵，由Food Court到街邊檔都可以食得到，而且水準沒有太大落差，一碟收費40至50銖左右，大約港幣十幾蚊，非常抵食。

Jason Reporter

一家靠晒佢

現代都市人已經唔可以接受無電話嘅生活，更何況係成日要上網嘅記者行業？單係小記身上已經有兩部電話一部Tablet，返到屋企真係幾多插蘇都唔夠使，所以近排就買咗呢舊可以一個插蘇分四個USB充電嘅火牛，可以充晒你身上嘅Gadget，亦唔使同阿爸阿媽爭插蘇，真係一家大細靠晒佢。

Michael Reporter

閃閃青蛙Galaxy S3套

小記雖麻甩，但都娶到個貪靚嘅老婆，佢不時會為部Samsung Galaxy S3換套。為了「孝敬」大人，最近就買了Sello出品的Amazonia系列畀佢，可能有人認為隻青蛙很「傻仔」，但小記就覺得很有型，至於用料方面更絕不馬虎，用皮革製造，比起先達賣十幾廿蚊嘅膠套高貴得多，青蛙眼上的水晶仲係Swarovski，你話幾高級呢！

Angus Reporter

換鏡扮型男

筆者對上嗰副眼鏡係結婚之後冇耐配，依家個囡囡都就快10個月大，你話我幾「長情」呢！早排終於想換吓形象，於是上咗旺角電腦中心斜對面間相熟上樓眼鏡舖，老闆不時去日本搵啲激罕靚框o架！左揀右揀，揀咗呢副玳瑁框配木臂嘅眼鏡，日本售價要成二萬幾日圓！有同事話，我戴咗有啲Johnny Depp風味喎！大家不妨望望在下嗰副尊容，係咪有少少唔開胃呢？

Tony Editor

人生首部音響

雖然筆者搬屋成年咁耐，但部分小型家電仍未添置。從前很喜歡買CD，但新屋就沒有一部像樣的Mini Hi-Fi，令家中CD無用武之地。可惜依家啲微型音響多只支援iPhone播歌，要搵部兼播CD又好樣的實在困難。早排同事介紹，買咗部Pioneer X-CM31DAB-W，播到CD、iPhone、iPod，甚至USB手指入面啲歌，仲可以收聽數碼電台，纖維板喇叭亦相當靚聲。原本度晒位置好好「供奉」，怎料千算萬算，竟算漏機背插頭長度，搞到部機要無奈打側放，拍唔到埋牆，當堂灰晒！

Alfred Reporter