星空奇遇記
大家想同伴侶數星星，刻意營造浪漫，扮「偶然」遇到一片萬里無雲的星空，其實唔難，不論大家去看星空定係去拍銀河，只要有呢批Apps就幫到手喇！
《Stellarium》銀河位置鮮明
初入門睇天文，一下子望上天，就算見到星星，都唔知係邊粒打邊粒。雖然iOS同Android都分別各自有觀星Apps推出，不過論功能或介面，都係呢款《Stellarium》好用啲。究竟有幾正？首先佢會自動以GPS定位令你可隨時搵到當時星圖資訊，介面亦做到同真正睇星無咩分別，加上《Stellarium》可以將星座具象化，好似金牛座咁，就成隻金牛Show畀你睇。除顯示星座之外，仲可以顯示埋銀河位置，咁就唔會盲摸摸成日以為銀河係其中一舊雲啦。
系統支援：iOS、Android
下載費用：iOS 免費、Android $20
《Google Sky Map》中文夠方便
其實Google有好多Apps都係誠意之作，《Google Map》就是一例，而呢個《Google Sky Map》都同樣夠晒實用，雖然要自行去Play Store下載，不過免費就冇所謂。一般星圖Apps都係外國出品，《Google Sky Map》都唔例外，而為了照顧到未學好外語嘅用家，所以就提供多種系統語言，一轉做中文，睇得順眼兼明白內容。而此App本身亦有夜視模式同簡單嘅搜尋功能，以免費App嚟講都算係交足功課。
系統支援：Android
下載費用：免費
《Moonrise》查月資訊
看星或影星最怕多雲，亦怕月色太亮，影響視野。如要避開這種情況，最好就係用呢個《Moonrise》查吓月亮幾時上山落山，仲可以做時間推移，咁幾日後咩情況都知啦！
系統支援：iOS
下載費用：免費
《Astro Panel（Astronomy）》細測天氣
睇天文台只睇到當日大概咩天氣，但係如果撞正要睇星嗰時先多雲就真掃興。想免得就免，裝呢個App吧，GPS定位之後可以睇到溫度、風向、月光甚至係未來兩個鐘多唔多雲。
系統支援：Android
下載費用：免費
《SkEye》追星拍檔
如果想影星，呢個《SkEye》係幾值得推介，佢勁在搵到啲你連肉眼都睇唔到嘅星雲，好似NGC 2237，用佢搜尋就可以搵到大概位置，咁就唔怕影成晚都唔知自己影緊乜喇！
系統支援：Android
下載費用：免費
《Meteor Shower Calendar》跟貼流星
想知幾時有得睇流星雨，用呢個App就掂，佢會提醒你下次流星雨幾時到，有流星雨的話，佢又會話你知幾時先係流星雨高峰期，保證你唔會錯失任何睇到流星雨嘅機會。
系統支援：Android
下載費用：免費
