環保Tee做個Water Saver

提起水資源（Water Resources），最令香港人頭痛嘅，或者只係加水費，好耐冇諗過「唔夠用」，其實聯合國早已指出全球有多達26億人唔夠水作衞生用途，根據世界銀行資料，就有88%嘅疾病源於飲用不潔食水導致，甚至有研究預測，到咗2025年，全球將有三分之二嘅人口得唔到安全飲用水及基本衞生服務，adidas在這問題上可說有心又有力。

要解決水資源嘅問題，節流比開源更重要，亦更易實行，除咗小市民日常生活要珍惜點滴，大企業亦都責無旁貸，除咗印刷業近年流行無水印刷（Waterless Printing），adidas亦喺運動用品界發起火車頭作用，與泰國嘅紡織物與成衣供應商Yeh Group合作，引入零用水製衣技術—adidas DryDye，以完全唔用水嘅方式染製衣服。

DryDye零用水染製

原來用傳統方法染製一件Tee，平均需要花25公升水，當閣下數數家中有幾多件Tee時，耗水量之大相信會令你O嘴。如今DryDye透過加壓嘅二氧化碳（Pressurized CO2）取代傳統嘅水分子（H2O），令染製過程完全零用水，並且同時節省50%能源及減少50%化學物，環保效果可見一斑。

四款以DryDye技術製成嘅新Tee已經抵港上架，眼利者或者會覺得熟口熟面，事關佢哋早喺倫敦奧運時已經率先現身。據知今次嘅DryDye Tee產量約五萬件，與傳統染製方式相比，就慳咗超過1,200,000公升嘅水，而且各自印上珍惜水資源嘅字樣及圖案，令每位用家都成為環保宣傳大使。adidas更表示將會擴大使用DryDye技術嘅範圍，但願未來將有更多旗下嘅衫褲鞋襪都可以零用水方法生產，讓唔同項目嘅運動迷，都可成為環保用家。

奪冠喜悅着上身

雖然新一季嘅NBA要到下個月尾先開鑼，不過adidas未有放慢腳步，就趁大家依然對新科狀元Miami Heat嘅凌厲戰績歷歷在目之際，推出多款相關嘅紀念Tee，當中最盞鬼嘅必然係全家福卡通Look，唔只全隊球星，前排中間仲有教練Erik Spoelstra，個個都笑到四萬咁口，尤其是LeBron James，Cool樣就見得多，咁寬容嘅親民Look認真少見，相信畫師都花咗唔少聯想力。同步上架仲有John Wall、D.Wade及Pau Gasol嘅球衣，NBA粉絲諗住開季前可以銀包止血？睇怕又要反悔了。

查詢：2506 0165、3514 4070