夜蒲戰衣
成名要趁早，24歲的連詩雅（Shiya）就是好例子。當初由模特兒進身歌手行列，派台歌在YouTube有過5百萬的點擊率，已是始料不及。到擔當話題電影《喜愛夜蒲》女主角，新作更衝破千萬票房，人氣有增無減，「蒲精」形象深入民心。撇低小妮子年少輕狂的一面，夜蒲其實都只是建立Social Network的門路之一，由Shiya親身教路夜蒲Look，你同我都可以做最養眼的Party Animal！
鞋踭最少3吋高
在戲中飾演富家女的連詩雅 （Shiya） ，因為欠缺家庭溫暖而去蒲吧尋開心，她更甘願做廿四孝女友，為男友排解寂寞，電影情節與現實中的她截然不同：「依家多咗工作，已經無咩機會好似時下年輕人咁跳舞飲嘢，就算係夜蒲都係去Cocktail Party同出席Event居多，摸下酒杯底咁。以前去蒲可以Hea着，依家次次都要Plan 定點Dress Up，着One Piece同Tube Dress居多，一定要諗方法突出條腰線，同埋起碼穿3吋以上的高踭鞋，咁先夠派頭。」長腿一向是她的賣點，唔露點得呀？
煙熏眼可免則免
蒲Look打扮當然要配合化妝髮型才算完整。Shiya說：「頭髮都係長直或微鬈最襯自己，另外眼妝最重要，畫眼線和塗睫毛液可以令雙眼大啲，看上去精神好多，但Smokey Eyes依家可免則免，簡簡單單已可突出輪廓，我諗對男仔嚟講，比濃妝艷抹更容易接近吧！」經理人大爆Shiya人前看似弱不襟風，其實平時小小事便興奮得Natural High，吱吱喳喳嘈個不停，可能呢啲係蒲精本色。
一定要諗方法突出條腰線，同埋起碼穿3吋以上的高踭鞋，咁先夠派頭。
Jessica連身裙一向是Shiya首選，設計簡單利落又收腰，去Cocktail Party或出席Event夠晒大方得體，膝蓋以上的長度更可盡Show長腿。
明知假睫毛令眼睛增大的效果最明顯，Shiya也寧選睫毛液，「最驚傾傾吓偈，食食吓嘢跌咗假睫毛，好狼狽！」
Disco等人多擠迫的環境容易溶妝，Shiya會隨身攜帶一盒多用途化妝盒隨時補妝，Benefit就是她的至愛。
10歲開始已經自己紮腰，睡覺都會Belt不離身，日子有功，令在場人士對其黃蜂腰羨慕不已。
Shiya自知唇色較深，塗唇膏一定要用比唇色淺的，避免造成孖膶腸的錯覺。
「身上的香味畀人第一個印象，所以唔同場合唔同衣着我會配番相應嘅香水。」Versace Yellow Diamond的花香清新，感覺不會太女仔，最合爽朗的女生如Shiya。
做模特兒出身，早已習慣穿高踭鞋，依家着上癮，無3吋高都唔着！去蒲更加要高人一等，增強信心！
夜晚黑麻麻，Shiya至愛戴上Bling Bling配飾，例如Thomas Sabo的出品，在人多擠迫的地方也非常突出。