Burberry Orchard「IT Bag」又要搶

Pasu Reporter：天文氣象有「藤原效應」、「蝴蝶效應」，時裝界就信「名模效應」、「明星效應」，不論衫褲鞋襪手袋手錶跑車，只要有當紅名模、明星捧場（真金白銀買嗰種先Work，代言人嗰種就唔一定！）銷量肯定可以直線上升！最新案例就有Burberry今季的「IT Bag」Orchard，袋款有齊絨面、鱷魚皮革，夾綿羊仔皮及麖皮，但都不是重點，最重要是有《變形金剛3》女主角Rosie Huntington Whiteley天橋外真人示範，仲要識揀低調暗格紋款，論樣貌、論身材可能不及Megan Fox，但時裝觸覺就應該高幾班！

PS：熱捧名牌手袋的同事C（編按：可在本頁尋找）係時候換新袋上場，為Instagram連載「Look Look Me Today」引起更高話題！

下北澤尋寶

Candy Reporter：如果不是工作需要，我也不會重遊日本，主因是當地匯率持續高企，削減個人的購買力，另外受輻射危機影響，始終未能回復信心。上月，再次踏足這片土地，東京的經濟明顯有很大轉變，昔日人來人往的潮店，變得冷清清。在這股沉悶的氣氛之下，決定轉戰下北澤，這裏有我最愛的咖喱湯飯、古着潮物之外，還有懷舊的兒時玩具，有心來尋寶，必有收穫。今回，偶然找到這對可愛塑膠公仔，店主說是70年代出品，盛惠3,000日圓 （約HK$300），價錢亦算合理。

變色龍

Moe Reporter：人一世物一世，唔係犯法的話，真係咩都想試吓。平日染髮染得多，前排見很多人玩漂染染到彩虹咁，心郁郁又走去試染後尾枕。小記去開Marek Art Of Hair整頭，話晒位處中環商業區，質素點都有保證。點知染完照照鏡，後尾枕的紫色在室內完全同黑色無異，心想坐3小時也不過染了黑髮，大為失望，原來好戲在後頭。

一星期後，後尾枕開始「出色」，就係我想要的「楊千嬅紫」，再過一星期係螢光紫，兩星期過後就係棗紅色，好似變色龍一樣咁過癮！好有衝動再試其他色呀！

醒神水潤Mask

Keith Reporter：幾時都話身體係最準確的天文台：自從過了立秋，天氣開始乾燥，雖然面上油脂少咗，但脫皮和細紋卻隨之湧現！加上記者工作經常暴曬，加速抽乾皮膚水分，只靠洗面補濕恐怕唔夠滋潤。所以小記平時半夜工作累了，會花十分鐘敷個Mask，順便歇一歇，皮膚同腦齊齊Refresh吓。最近我就用緊西藏天山河水提取而成的Garnier 2nd Skin Mask，其水潤度足以抵住皮膚3、4日的水分需要，不但水潤，細紋更明顯減淡，第二日返工便可以醒神面目示人！