無風衝浪撐走Bye Bye肉

究竟Model玩咩呢？準備撐艇抑或滑浪？其實兩種講法都只係啱一半，因為這個近一、兩年才在港興起的水上活動名為立式單槳衝浪（Stand Up Paddle Surfing），或者簡稱做SUP。跟一般滑浪運動最唔同之處，係風細時可用單槳撐出航道，等大船經過時起浪就可以即衝！講刺激感，SUP未必及得上滑浪，但優點在於技巧要求比較低，而且玩一個鐘抵得上跑步個半鐘，趁住夏天餘暉未盡，撐走Bye Bye肉就最啱！

風平浪靜照玩

相比起加州、峇里或者夏威夷，香港風浪一啲都唔大，要玩滑浪比較困難；而立式單槳衝浪（SUP）好玩在無風無浪都可以起動，無浪時可以企在滑板上單槳划行，有浪先衝，唔使搵命博等打風先有得玩。香港有得玩SUP嘅地方唔算多，赤柱香港水上活動拓展中心係其中一處，負責人Fesco就話，喺香港玩SUP嘅人，都係以Keep Fit為主，因為真正要做到衝浪動作，基本都要先划上一小時，才可以去到大船航道，靠大船經過有「湧」時先有得衝，未必個個參加者咁有耐性。不過喺滑浪板上平衡加上撐艇嘅動作也算帶氧運動，撐一小時幾乎已等同跑步個半鐘，好過玩跑步機。

企後一步更易控

SUP所用嘅滑浪板跟傳統的有所分別，主要係SUP板較闊較厚，浮力較強，亦較容易掌握。Fesco稱滑浪板款式多多，更拎起本SUP專門雜誌逐一介紹，解說獨木舟尖頭設計速度會較快，但係一眾新手都係玩圓圓厚厚款式穩陣得多。

下水之前，Fesco詳細講解滑浪板結構跟站立姿勢：「滑浪板上有三條線，左右腳平放踩在兩條外線上，但企法並非如Surfing般前後腳。至於Handle位置屬滑浪板中央，前後一步位置都屬Sweet Area，企上去夠穩陣，唔使擔心翻轉。如果想控制得好啲，喺Handle位企後一步會仲好。」上堂完畢，即時落水玩！

上板行直線都有竅妙

玩SUP第一步就要學識上板。只見Fesco單手按住板邊即刻企上滑浪板，莫非真係咁易？Fesco提醒：「你哋唔好跟啊！學番最基本上板動作先。」模特兒聽從指示，首先將船槳放喺滑浪板最前位置，然後㩒住板邊將上身放在板上，慢慢將雙腿移上滑浪板。當全身趴在板上，就可以好似傳統滑浪一樣以雙手在板邊潑水前進，然後變為下跪姿勢，到最後就可企在板上，大功告成！

初學者如驚跌，Fesco教路，千祈唔好望住雙腳，向前望會穩陣啲，而且當滑浪板向前移動時先好企起身。只得一支槳點行直線？如果唔嫌麻煩，左一下右一下咁划都可以行到直線；但Fesco就教個「聰明」方法，譬如向左邊划槳，划槳時身體重心稍為向左，然後以反「C」形狀方法向後划槳，相反方向就變成正「C」果然得咗！玩到呢一刻已開始覺得攰，浪未衝但Fit已Keep！至於究竟點衝浪？上YouTube就有大把高手示範片段。

13歲以上先玩得

為安全計，玩立式單槳衝浪最好穿着救生衣，「處女下海」都冇咁驚，但由於救生衣浮力太強，根本做唔到浪底下潛越的動作；Fesco就話想玩立式單槳衝浪，一定要13歲以上，並能夠在沒有救生衣輔助下游到50米先得。

點樣揀槳？

Fesco教路，鋁合金槳較平但較重，纖維槳較輕但較脆，而至於Carbon槳就集輕同硬嘅優點，亦係最Top Model。畀女仔用又可以點揀？Fesco就幫Model揀咗支輕身而且槳頭可以調校長度嘅槳，控制方面會比較容易，划槳時用一隻拳頭揸實槳頭，同扒龍舟握槳手法一樣。

香港水上活動拓展中心

費用：

2小時課程（每人）：$250（會員）/ $400（非會員）（最少2人起）

租用滑浪板及槳（1小時）：$80（會員）/ $150（非會員）

租用滑浪板及槳（3小時）：$200（會員）/ $350（非會員）

租用滑浪板及槳（全日）：$300（會員）/ $500（非會員）

地址：赤柱正灘

營業時間：早上10時至下午6時（逢星期二休息）

查詢電話：8211 3876

查詢網址：aquabound.com.hk