來自京都滿天宮的招財貓

雖然香港有唔少地方賣招財擺設，但筆者既唔鍾意招財貓的傳統紅色Look，又怕瓷器易碎。早前去日本旅行時打算買隻木製達摩，點知睇唔啱款，反而搵到較另類的招財貓。話說在京都滿天宮附近的食品市場，有兩間專賣招福布藝擺設的小店，一間Sell青蛙，另一間Sell貓。賣貓的叫「招喜屋」，入面滿是身穿不同顏色和服的布製招財貓，而筆者一眼睇中呢隻藍色，襯晒我家漫畫屋風格，仲要只賣三千日圓，咁就即刻科水帶返香港。

Alfred Reporter

唔使行到鞋口鞋面

做記者呢行成日要行行企企，有時甚至要攀山越嶺，你話唔好好對待隻腳點得？New Balance就出晒名好着，如果係美國製造就更加正，你睇呢對991就係少數美國製嘅款，着落去嘅舒服程度又係另一種境界。雖然貴就貴少少，不過行成日對腳都無攰到，值得！

Michael Reporter

抵玩型格籃鞋

今個月一口氣入手兩對鞋，繼New Balance之後，今次就有「型格籃鞋」。呢對Adidas籃球鞋純粹是為了打波而買，依筆者的打波頻率計算，應該可以着三五七年。至於入手理由很簡單，平！$650一對籃球鞋已經是相當廉宜，折實後四舊水有找，根本沒有給筆者半點Say No的理由，而且着上腳十分舒服，保護性看來不錯，完全不夾腳，最重要個款夠哂Classic，落到場可以保持低調。其實對鞋稱不上型，點解叫「型格籃鞋」？修辭之嘛，認真便輸了。

Jason Reporter

烈佬呢喃自語

買書，其實唔難，所以台灣書店來港開店，好容易就買滿$1,000做會員，但明明自己的讀書速度及不上買書速度的十分一。在那台灣書店，要找再偏的台灣書都不難，但本地書未算太多，想找黃碧雲本新書《烈佬傳》就找不到，要過兩條街到本地書店買，其實都有九折優惠。黃碧雲文字很有毒性，追看多年，一出書即買，當然由《沉默．暗啞．微小》後有七年時間無新作推出，到去年才出《末日酒店》。對比《末日酒店》的艱澀長句，《烈佬傳》短句似呢喃對白，更脗合其實不太烈的「佬」的自述，讀到一半已想走到灣仔舊區重塑當年的模樣。

Brian Reporter

我愛科幻摩托

身邊朋友都知，小記係個Figure迷，但多年來只玩人偶，巨型作品如Batmobile等因售價及空間問題，遲遲都唔敢入手；直至《TRON: LEGACY-Light Cycle》的出現，其超科幻設計終於令小記忍唔到手。這作品其實早於兩年前的HT東京10周年展上看過，當時已覺得是神作，如今實物到手，更覺得與其說是它是玩具，倒不如說它是藝術品。人偶、車身都可發出冷光，全黑下Cool到震！唯一問題係車身用的AA電比人偶內的餅電強得多，令光源不平均，若能改善便十全十美！

Gilbert Reporter