三星集團進軍時裝界

Joshua Reporter：韓國的三星集團業務多元化，最為人熟悉當然是電子業務。剛在明洞開幕數個月的時裝店8 Seconds，當中的8字，其實代表着無限，而創立該品牌的第一毛織公司，正是隸屬三星集團。集男女裝、家居服飾等於一身，主打25至35歲年輕人路線，設計風格簡約舒適，明顯以H&M及ZARA作為假想敵，自開幕以來深受歡迎，更不乏星級捧場客。據集團公布，他們計劃2012年在韓國開設12家分店，至2014年則會有60家。屆時更會進軍中國市場，想先穿為快，去到首爾緊記掃貨。

笑看風雲

Konnie Reporter：平時在香港，通常都是躲在遮天蔽日的Office內，忙到一頭煙，哪管天空上面舊雲係咩形狀和有幾趣！所以一有時間，都不會錯過可以擔天望地過日晨的機會，尤其是放工坐車返屋企，總愛找個靠窗位，抬頭欣賞天空多變的雲霞。天空中一片又一片「過鏡」的雲，時而變成可愛的啤啤熊，時而變身可惡的棉花魂，有時又會變成一Pat屎咁，都唔知似啲咩。其實做人同做雲一樣，哪管下一秒變成怎樣，最緊要懂得笑看風雲，這樣做人一定會輕鬆得多。

熱死山東老鼠

Boris Reporter：唔講唔知，歐洲班死懶鬼，唔做嘢搞到自己經濟唔好，當然唔抵幫，但原來連美國都大受影響！點解我會咁講？因為我喺內地山東見到「米妮」靜靜雞搵秘撈呀！

不過，睇真啲原來係「A貨」，為搵銀呢隻A貨米妮喺大熱天時30幾度高溫在戶外工作，水都無滴飲之餘，戴住個大頭套走來走去，真係見到都怕佢會熱死，難得由山腳爬上山頂可以坐纜車抖一抖啦，點知又有個肥仔「陪坐」，真係只能輕嘆一句：「搵食艱難！」

東瀛巨獸

Dick Lau Reporter：日本超人多，但怪獸都有不少，上星期又多一隻，在日本築波展覽中出沒！這隻怪物長11米、重17噸，是隻外形如「變形金剛」的機械甲蟲，其巴閉之處，不但六腳可動能走，大角還能上下擺動，且可大噴煙霧，夠晒架勢！而駕駛者除可坐上甲蟲駕駛，還可選擇遙控，可乘載5至7人同行。其「父親」原來是位已年屆60的老工程師，11年來天天躲在車庫內，砌出這隻龐然巨物，日本人對巨大機械的迷戀，真不是「砌吓模型」咁簡單，其實夢想能否成真，就全看你是否有足夠認真。