格鬥機械人《Battle Robots!》

機械人卡通係唔少男士嘅童年回憶，最鍾意梗係機械人威武又好打！《Battle Robots!》呢隻新遊戲同樣以機械人作主題，不過用家控制嘅主角就好弱雞，一開始盔甲、武器咩都冇，勝在可以慢慢同電腦對打贏錢賺裝備，都好襟玩。

120關夠誇張

驟眼睇此App嘅Icon，仲以為係名作《炸彈人》；雖然玩法唔同，但畫風就相當得意。遊戲開始時，玩家隻機械人光禿禿，要靠同電腦對戰先可以贏取頭、手、腳、身以及武器，總共429件裝備畀你加強機械人嘅能力。話就話係格鬥遊戲，不過就唔會捽到手指痛，皆因出招只需篤芒或者橫掃就得，好易上手！最誇張係有成120關畀你慢慢打，每關都有三個對手同你打，想爆機絕對唔容易。

系統：Android 2.1以上

下載費用：免費

美食日記《Evernote Food》

打開「面書」，十個朋友有九個都鍾意影低美食Share畀你睇。如果你身邊都有呢種朋友，記住推介佢用《Evernote Food》。此App顧名思義是畀大家記錄低你食過嘅美食，仲可以同時記錄埋開餐地點、標題、食評等資料，隨時同朋友分享，人人都可以變蔡San！

方便整理

每次影完一堆食物，之後睇番，往往會唔記得咗喺邊度食、同埋好唔好食。這App就預設一個專為食物而設嘅範本，可以畀你輸入圖片、地點、食評，又可以將同類主題嘅食物相片分組整理好，當旅遊日記都仲得！如果想Share畀朋友都冇問題，因為輸入全部資料後，就可以分享到Facebook等社交網絡，朋友肯定Like你啦！

系統：iOS 5.0、Android 2.2以上

下載費用：免費

經典彈珠《Pinball Arcade Free》

將經典嘅街機彈珠機款移植至手機，而且仲有超立體嘅3D效果，畫面又繽紛，好似置身街舖一樣，消閒必玩！

系統：iOS 4.3、Android 2.2以上

下載費用：免費

開學記事《Any.DO》

就嚟開學，肯定又有一大堆功課，想時間分配得更好，一定要用《Any.DO》！這App可以將工作分時間列出，仲可以加入優先、提醒等功能，比手機原本嘅日曆好用得多。

系統：iOS 4.1

下載費用：免費

魔法養羊《Retired Wizard Story》

話說你係一位巫師，喺村莊入面養羊仔，突然有一日全部羊仔都想逃走，你就要用魔法阻止佢哋。聽落故事都幾無聊，不過玩落又幾過癮，邊玩邊可以幫魔法升級，仲有成10關100級畀你慢慢煲機。

系統：Android 2.1以上

下載費用：免費

罰球王《Freekick Battle》

執筆時，利記嘅蘇亞雷斯對曼城啱啱入咗球超靚罰球。想好似佢咁，玩《Freekick Battle》啦！有龍門同人牆，想Curve入龍門都唔係咁易，儲夠分又可以幫人物升級技能，仲可以同外國玩家對戰添！

系統：Android 2.3以上

下載費用：免費