《Dead or Alive 5》靚女誘惑你

《Dead or Alive 4》已經係七年前嘅出品，搞咁耐先喺嚟緊9月出新一集《Dead or Alive 5》，照計應有啲睇頭，唔係都幾難同Fans交代。查實《DOA》系列賣點係乜，大家都心知肚明，所以今集TECMO就落足工夫將啲女角整到有咁靚得咁靚，有咁「蕩」得咁「蕩」，而且Close-up仲見到心口滴晒汗，誘惑力十足，就算有《Virtua Fighter》結成晶同Sarah參戰，都變得唔重要囉！

拋胸兔女郎肉搏

《DOA》系列一向都係靠晒兩大台柱Kasumi同Ayane以性感裝束吸客，今集都唔例外，除咗原有性感靚衫之外，TECMO仲特別在初回限定特典入面幫佢哋兩位製作咗套超性感兔女郎服，睇見佢哋兩個着住套新衫肉搏，真係睇到「嘩嘩聲」！得兩個女角着兔女郎衫可能太悶，TECMO之前亦搞咗個選舉，畀大家投票邊個女角有「新衫」着，結果就由Hitomi當選，不過如果畀筆者揀，會揀一向賣腳嘅Kokoro囉！雖然今次TECMO都話用新技術重新製作Eliot同Brad兩位型仔角色，不過點睇都係一眾女角搶晒鏡，Deep V、比堅尼同肚兜出齊，加上跌蕩嘅身材，引死Fans！

《VF》兩大角色助拳

為咗令遊戲誘惑倍增，開發小組更用上新遊戲引擎，以求打造更玲瓏浮凸同拋胸嘅震撼場面，震動效果強過前幾集；仲有今集加入秘密武器─滴汗，Zoom近睇女角嘅頸項同心口，都可見到因激戰而滴汗嘅效果，最初版本遊戲封面就更加以滴汗及白滑頸項做賣點添！衣服除咗少布之外，亦會愈打愈污糟，提升真實感，不過如果係件衫愈打愈爛愈多窿就更妙。TECMO都睇到呢幾年格鬥Game都要玩Crossover先至可以提升新鮮感兼吸引Fans，所以今集亦請來兩個Sega《Virtua Fighter》系列經典角色結成晶同Sarah過嚟幫幫手，不過緊身衫上陣嘅Sarah似乎被其他肯打肯露嘅女角比下去。

出絕招觸動機關

戰鬥系統都沿用一貫設計，但今集加多咗個新攻擊技巧Power Blow，只要使出呢嘢新絕招就可以觸動場景上嘅機關，營造華麗又有趣嘅效果。好似喺馬戲團場景「The Show」入面發動絕招，就可以將對手掟入巨型小丑機關的紅鼻入面，然後對手就會好似炮彈飛人咁彈射出嚟，中招後真係好傷。至於場景都幾多元化，好似有日本庭園「Sakura」或者馬戲團場景「The Show」，至於參照福建土樓嘅「Home」都好正。遊戲模式都離唔開Story、Versus、Arcade同Time Attack等基本玩法，至於Online模式方面比較特別係設有Online道場，可以同朋友一齊練習線上對打，練熟晒所有招數，再出去挑人機都未遲。

INFO

類型：格鬥

開發：TECMO Koei Games

平台：PS3、Xbox 360

推出日期：9月25日

售價：¥8,190