聖戰士翼霸升級回歸

日本Sunrise推出過唔少機械人動畫，不過唔係套套收得，例如1983年嘅《聖戰士登霸》，玩偏門嘅昆蟲機設路線，加上冇喺香港電視台播過，知名度自然弱啲，好在透過電玩《超級機械人大戰》系列而人氣反彈。早年「MS in Action」都出過相關玩具，不過論細緻度及可動性，今次Robot魂嘅「翼霸」（Billbine）先算令人滿意。

變形設計簡單利落

作為原著中唯一一款可變機體，翼霸嘅變形機關相當簡單，首先揭開左右胸甲，將內藏嘅鳥頭拉出再遮住機械人個頭，之後將前腕前後反轉，拆埋拳頭以及伸爪，最後雙腿向後縮及收起腳趾，就變成猛禽形態Wing Caliber。講到細緻度，比起MS in Action進步得多，例如透明藍嘅胸甲可以打開，內藏新增嘅駕駛艙內籠，可惜未有跟埋機師「座間翔」嘅相同比例Figure。至於背部嘅昆蟲翼造工細緻，灰黑色透明件有清晰紋理，連同左、右背包及輔助翼都有Ball Joint調整角度，令飛行甫士更加傳神。

傳神必殺技特效組件

高可動性係Robot魂翼霸嘅重要賣點，膊頭可以前後擺動外，配合手肘嘅雙重關節，可以做出從後拔劍嘅大角度動作。根據原裝設計，小腿背後近膝蓋位置有一組噴射口，本來會影響屈膝角度，Robot魂好醒目咁為噴射口追加移位功能，將問題圓滿KO，而且膝蓋採用雙關節，加埋腰位又冇任何裙甲阻住，可以擺出難度甚高嘅單膝跪動作。

武器方面，光線槍嘅槍柄設有弧位，握槍時唔會頂住上臂，可以擺出自然嘅持槍甫士，不過弧位只係向左彎，所以以上賣點只限右臂受惠，至於背部雙炮亦可向前拉出。最好玩當然係絕招「奧拿斬」，事關隨盒附有透明黃色嘅劍風特效組件，套入劍刃部分，就可模擬出揮劍時嘅殘影，甚有原著動畫嘅風味。

查詢：2433 1828（瑞華行）