Mad Catz專業遊戲配件三線齊發

要打機打得叻過人，除咗好講求個人天賦同後天練習之外，專業遊戲配件都真係唔少得；用過之後，就會明白點解人哋開槍總係快你零點零幾秒！專出遊戲配件的Mad Catz，最近返咗幾款新貨品，譬如有Tritton Detonator同Trigger遊戲耳機、R.A.T. 7 The Contagion遊戲專用滑鼠以及MLG Pro Circuit Controller兩用手掣，用齊嘅話，誇張啲講句，上中下路都真係毫無破綻！

Tritton Detonator獲Xbox 360認證

對打機耳機有乜要求？最緊要當然係戴得舒服，同收音咪要夠清晰，跟隊友溝通時都唔怕Miss。Tritton Detonator耳機設計都算有型，耳罩貼耳舒服，兼可像DJ耳機般扭動，方便單耳聽住遊戲音樂。至於通話收音咪可以拆除，方便戴出街聽歌；歸功於50mm單元驅動下，音質表現都有中上水準，包圍感亦強。而且呢款Mad Catz打機耳機有Xbox 360官方認證，頭帶中有Xbox 360字樣，信得過！

另一款同樣有Xbox 360嘜頭嘅打機耳機就係Tritton Trigger，遠睇真係同Tritton Detonator好似樣。細睇過會發覺耳罩上的T字Logo唔同色，而且Tritton Trigger收音咪不能拆除，而且只用上40mm直徑單元，音質稍遜於Detonator，但當然價錢上分別都頗大。

R.A.T. 7 The Contagion變形金剛設計

Gaming Mouse琳琅滿目，市面上大把選擇可以揀，但講到最古靈精怪，要數呢款「變形金剛」造型嘅R.A.T. 7 The Contagion。R.A.T. 7有幾個唔同顏色版本，The Contagion就係用上白色，外形設計跟同系列幾乎一樣，譬如可以將鼠尾拉出增加長度，以及加入不少金屬組件如齒輪同滾動按鈕。實試手感其實幾好，想轉Cyborg模式或dpi，都可以用右手拇指及食指輕鬆做到，而且亦可鬆開機底的螺絲桿，增減砝碼，調整滑鼠重量。

MLG Pro Circuit Controller玩盡兩平台

唔少人都有齊兩個平台嘅遊戲主機，但兩者手掣有好大出入；而呢個可更換部件嘅MLG Pro Circuit Controller，就可以一掣兩用，打遍PS3同Xbox 360。其方向掣、Analog掣、功能按鈕以至面板都有一如原廠嘅兩Set設定畀大家揀，全部以磁力黏貼，更換部件夠方便。雖然定價較貴，但連接穩定，對Pro Gamer嚟講都用得過！

查詢：2728 9988