開學倒數！實用Apps做功課

仲有一個星期就開學喇！預咗一大堆功課同報告殺埋身；今時今日想學業成績有進步的話，就一定要活用Apps！皆因App Store有齊時間表、Schedule Apps幫你管理時間，又有地圖、字典Apps幫你學習，自然事半功倍。

《Penultimate》電子化記事

幾乎每堂都要Jot Note，想記事更有系統，《Penultimate》就一定啱你。這App只可手寫，又不設圖片輸入，不過勝在用法簡單，用家可以選擇筆迹、顏色以及背景，仲可以將內容以Email分享。重要是操作爽快，用落似足用紙筆記事。

下載費用：$8

支援平台：iPad iOS 3.2或以上

《Google Drive》5GB上傳

做完嘅功課同報告，穩陣起見，都係就做埋備份，擺上《Google Drive》就最好不過；用家只需有Gmail帳戶就可以即時使用，有5GB免費上載空間，擺幾千個File都冇問題！而且仲可以隨時將文件Share畀其他同學，做小組報告就最啱使！

下載費用：免費

支援平台：iPhone、iPad iOS 5.0或以上

《iHomework》提你交功課

家課堆積如山，萬一唔小心記錯Deadline遲交扣分就真係慘喇！《iHomework》可以幫你將功課分日期、科目整理好及預先提醒你，仲可以輸入分數、備忘等等，功課情況就可以一目了然啦！

下載費用：$8

支援平台：iPhone、iPad iOS 4.0或以上

《World Atlas HD》全能地圖王

不少中學生都要買本大地圖上堂用，不過堅係重，拎返學超唔方便！咁下載此Apps吧！佢提供高清地圖之外，更有國旗、人口、首都、宗教、語言、貨幣以及GDP等詳細資料，可以同時學常識以及地理知識。

下載費用：$8

支援平台：iPad iOS 3.2或以上

《Convertbot》單位換算

知唔知一呎等於幾多厘米呢？唔知唔緊要，《Convertbot》內置超過440個不同單位的換算，當中包括長度、角度、面積、重量、壓力、速度、時間等等，就連貨幣都有埋，一定用得着！

下載費用：$15

支援平台：iPhone、iPad iOS 3.0或以上

《Dictionary.com-Dictionary & Thesaurus》字典學生字

見到英文生字唔識解，梗係要用字典App查一查啦！此App不但內置200萬個字詞解釋，而且更提供例句、發聲、字詞來源歷史等等，更有「Word of the Day」及「The Hot Word」，學習生字肯定要有！

下載費用：免費

支援平台：iPhone、iPad iOS 3.0或以上

《iStudiez Pro》上堂時間表

讀書時代都會將個TimeTable擺落手冊度，方便隨時睇，不過新App就似乎更加方便。《iStudiez Pro》可以將每一堂、考試甚至功課輸入到時間表內，一睇就知道有冇撞時間；而且仲可以將學習進度、分數一併輸入，溫書、上堂都更有系統啦！

下載費用：$8

支援平台：iPhone、iPad iOS 4.1或以上

《Flashcards Deluxe》背書必備

雖然阿Sir同Miss成日都話讀書靠理解，不過想成績好，有啲內容少不免要死背。《Flashcards Deluxe》就可以將文字、圖片及聲音記錄在電子Flash Card內，隨手一掃就可以轉換生字，絕對係背生字嘅好幫手！

下載費用：免費

支援平台：iPhone、iPad iOS 4.0或以上