玩味贏晒Revoltech Spider-Man

本地薑Enterbay及Hot Toys，做電影Figure做到出晒名，日本嘅Revoltech亦都唔執輸，照樣泊實荷里活呢個大碼頭，繼Batman、Transformers及Iron Man，最近連Spider-Man都出埋。雖然Revoltech嘅尺寸（高約135mm）比1/6 Figure細得多，神似度及精細度自然有所不及，但正正因為冇畀「造型先決」縛死，加埋獨家嘅轉輪關節，可動性反而贏幾條街。

啱啱先上完《The Amazing Spider-Man》，好多玩具迷都誤會Revoltech嘅Spider-Man正係參照新戲設計，實情係用2007年嘅《Spider-Man 3》版本至真，所以心口嘅蜘蛛Logo並冇「過界」，唔似新戲咁樣兩隻後腳伸到落肚，至於雙目亦用番元祖嘅白色，並唔係新戲嘅淺黃色，所以咪以為廠方偷懶冇Update。

地台唔只得個樣

Revoltech Spider-Man嘅一大特色，就係附設大廈外牆做地台，而且Spider-Man唔使喺背脊開窿插榫，單憑蜘蛛絲嘅結網部分，以榫位連接屋簷，就可以令Spider-Man倒吊起來，何解一條幼長嘅蜘蛛絲就承托到Figure本體？除咗榫位夠實淨，蜘蛛絲亦韌度十足，至於真正關鍵係蜘蛛絲表面夠粗糙，令Spider-Man可以輕易握實，唔易跣番落嚟，加埋地台牆身微微傾鈄，令Spider-Man可以挨埋去借力，背脊就唔使開窿有礙觀瞻，抵讚！

關節靈活又夠穩

Spider-Man一向甫士多多，Revoltech版本都做得到，善用地台就可以展現攀爬及發射蜘蛛絲等甫士；數真啲，原來地台有成九個插孔咁多，平均分布喺屋簷、窗台底及渠管旁邊，配合四支榫位配件，一邊插入腳掌，另一端插入地台，就可以輕易擺甫士，加埋堅固嘅轉輪關節，確保Spider-Man關節屈曲時唔易鬆脫，方便Hold住定位。再者，隨盒備有握拳、開掌及發射等多款造型手掌，又可以喺手腕Ball Joint套上蜘蛛絲，模擬發射效果，單計玩樂性，比起1/6 Figure分分鐘猶有過之。

貳號機重裝回歸

《新世紀福音戰士新劇場版》嘅第三部曲《Q》，將於11月17日喺日本上畫，據知上集生死未卜嘅明日香，仲有佢嘅貳號機都會神氣回歸；Revoltech又點會執輸，啱啱宣布將會推出《Q》版嘅貳號機，最大賣點係連埋大型飛行裝置，以及超長嘅狙擊炮，而且搶閘喺10月15日於日本上架，相信香港方面大約一個禮拜左右就會派貨，「福音」信徒要Mark實日子喇。

推出日期：10月中

售價：¥4,480

查詢：2148 9483（精品）