樂活感覺

Brian Reporter：因為打風，早前台北之旅被迫縮短行程，急急腳趕去機場，納悶此行應無任何收穫，怎知在禁區發現了一間專賣台灣原住民產品的商店；筆者除了買了個泰雅族圖案小錢包，更買到了心儀已久的原住民歌手以莉．高露唱片《輕快的生活》；她唱國語也唱阿美族歌曲，縱使聽不明白，但閉上眼就可想像到稻田、河流、微風、太陽的樂活（Lohas）感覺，尤其是第一Cut《結實累累的稻穗》舒服到不得了。難怪她今年獲得台灣金曲獎最佳新人獎及最佳原住民語歌手獎，若10分滿分，我會畀9分。

我老婆好大食

Gilbert Reporter：男人玩具有四種︰美酒、相機、名錶加靚車。美酒對身體唔好，無福消受；相機日用夜用，公餘謝絕；名錶則人工所限，有排都玩唔起。但數到車，經過多年來死慳死抵，上個月「它」終於進入我的生命！呢部馬六雖然一把年紀，但性能依然紮實，起步快、入彎準，落斜時輕輕踩Brake即有反應！唯一問題係食油啲，但世上冇完美，呢個老婆我愛定的了！

螢格男鞋NB420

Jason Reporter：以往從未着過New Balance的鞋，近期心思思買了一對NB420，四百蚊唔算太貴，過到自己心理關口，當初第一眼見到對鞋是被它的外觀吸引，黑底襯螢光綠，撞色撞到天衣無縫，想低調仲可以換條黑色鞋帶，最大驚喜係估唔到着上腳咁輕咁舒服，為了雙腳，值回票價吧！

跑步聽歌唔怕汗

Angus Reporter：小記最近迷上跑步，習慣帶埋部iPhone連耳機一邊聽歌一邊跑，但跑兩跑就大汗淋漓，耳機長時間沾上汗水，真係唔慌襟用得去邊，所以就花$599買了Philips防水MP3機GoGEAR Action，佢表面經防水處理，就算有汗水都無問題，音色都算唔錯，內置有4GB記憶量，直接戴上耳就可以聽歌，連iPhone都唔使，乾手淨腳。

Wild Tiger駕到！

Alfred Reporter：上個禮拜小記去咗Bandai嘅「Tamashii Features Vol.4」，親身見識過「12PM」12吋Figure系列，仲要係「賣飛佛」嘅《Tiger & Bunny》！老實講，Bandai嘅玩具質素唔需要去質疑，只係索價$35,000實在進取咗啲。無奈小記睇完心郁郁，卒之去模型店整番隻1:8 MGF嘅Wild Tiger嚟過吓手癮。MGF版勝在可動性高，配件又齊，$300蚊有交易，砌完係咪靚仔先？

每日豐盈手感

Michael Reporter：好多人以為唔係打機的話，一隻普普通通的Mouse已經夠用，加埋無線就最無敵。計我話梗係唔係咁！作為一隻滑鼠，「精準」係幾咁緊要先得o架！若果用啲老爺機Click錯隔籬位分分鐘又唔知要Load幾耐，所以近日就忍唔住買咗呢款Steel Series SENSEI，見佢個滑鼠燈光可以控制光暗，咁就唔怕太高調，個樣又鬼咁型，手感仲好舒服添！