on.cc 東方互動主頁

新加坡直擊《Borderlands 2》潘朵拉巨樹下合力打怪

為了超越市場上幾隻王牌射擊遊戲，Gearbox兩年前就出咗結合RPG「升呢」玩技能樹嘅射擊遊戲《Borderlands》，以美式漫畫風格掛帥，結果市場反應相當好。早前Gearbox就請咗亞洲區傳媒去新加坡試玩下個月登場嘅續集遊戲《Borderlands 2》。開發小組都幾狠心Out晒上集四個主角，換上新班底，而技能樹就大幅強化，生鬼抵死嘅招式同場景設計亦加碼，值得推介畀唔喜歡Hardcore射擊遊戲嘅玩家！

Gunzerker不文手勢引敵

今次呢個亞洲傳媒試玩會兼新加坡玩家Party，由Gearbox創辦人Randy Pitchford親自介紹遊戲嘅新賣點，而四位新角色包括有可使出Longbow Turret長弓炮塔嘅「Commando」Axton；具Phaselock相位鎖定能力及有強大治療能力嘅「Siren」Maya；能夠使出誘敵之計嘅「Assassin」Zer0；同埋Randy口中最啱新手玩家用嘅「Gunzerker」Salvado。Gunzerker特點係可以用上大量槍械，雙手使用武器都得，而且當能力樹中「Brawn」升級升到最強之時，便可使出一招「Come at Me Bro」—以不文手勢挑釁對手。至於四位被Out嘅舊主角，就會以NPC形式在遊戲中出現。

兩波攻擊打足半個鐘

遊戲有大量道具畀大家裝身，令造型可以千變萬化。Randy話為咗益玩過第一集嘅玩家，會額外送出每個角色各兩款個人化道具以資獎勵；不過佢笑笑口話，如果大家打機時見到有角色着住「Gearbox」特別版戰衣，佢應該係開發團隊成員，因為呢套衫一般玩家係買唔到嘅。言歸正傳，即場試玩四人連線合作版圖，筆者揀最易入手嘅Gunzerker，而且由於有Cheat Code關係，大家一開始已經Level三十幾，可以用到頗多技能，好似筆者嘅Gunzerker已識得拎雙槍同做不文手勢！不過遊戲難度都算幾高，不時要垂死等隊友救援，不過好在Gunzerker用勁槍，臨死前都可射低敵人復活自救！但打完兩波攻擊，就足足用咗成半個鐘。

幾千萬支槍任用

不過點難玩都唔及開發小組親自示範打終極Boss The Invincible咁誇張，集齊佢哋四個Level 50嘅能力，打足15分鐘先扣到Boss 15%能源！點解咁難玩？Randy話之前E3展有人嫌版圖太易玩喎！不過佢話正式版其實冇咁難，但就要花時間長煲，因為要去到Level 35基本上都要花30至40個鐘。而RPG遊戲好處係當玩家覺得唔夠打之際，係可以返去之前版圖打怪升呢！至於武器系統，上集已經以超多款出晒名，據估計有1,775萬款；Gearbox話今次武器數量亦會加碼，數量真係連佢哋都唔知，大概會係前作四、五倍，即係可能去到8,000萬種，值得玩家期待！