港版《GTA》《Sleeping Dogs》夠激！

唔少遊戲都用香港做遊戲背景，好似早幾年賽車Game《GT4》，以及嚟緊10月推出的大作《Biohazard6》都加插香港場景；但講到成隻遊戲都喺香港玩，睇嚟就只有今日正式面世嘅「港版GTA」《Sleeping Dogs》（中文名叫《香港秘密警察》），無論招式、動作都激過正版《GTA》，仲有好地道嘅廣東話「配音」，可以話係近期其中一款最有Noise嘅遊戲！

取材自賣座黑幫電影

《Sleeping Dogs》故事講探員沈偉為咗要搜集黑社會罪證，因而化身臥底從嘍囉做起，潛入社團搜證。最初主角要先得到童年死黨馬龍信任，由佢帶入社團，而背後接頭人係督察潘卓，一步一步為社團立下「功績」以接近社團核心。橋段有啲熟口熟面？原來開發小組除咗嚟香港做咗好詳盡嘅資料搜集之外，仲參考過多部香港賣座黑幫電影，所以玩玩吓發覺有啲似電影情節都絕唔出奇！

街景像真 招式殘忍

遊戲場景真係做得好真實，好似街道上嘅大型招牌、電話亭、行人天橋或者街市咁，都有九成似。至於遊戲玩法同《GTA》一樣，有好高自由度，為咗要幫社團完成任務，通街群毆隻揪，開槍亂掃又或者搶警車橫衝直撞都係基本動作，就好似試玩版中第一版，沈偉就要追足九條街衝上行人天橋，以一敵十赤手空拳搞掂對手，論刺激感，比起玩法同故事模式接近嘅《人中之龍》更強！但係單單赤手空拳或者槍械駁火都未夠激，《Sleeping Dogs》可以使出更殘忍的手段了結對手，由掟人落垃圾桶，推人入大火爐以至用雪櫃門夾頭都有，玩落亦好有電影感！

廣東話配音添親切

為咗提升遊戲的電影感，開發商更專誠搵來荷里活演員為遊戲配音，而且仲度咗唔少精警對白，總計對白長度有成兩小時。不過始終遊戲都係外國開發，遊戲角色主要都係講英文，所以照計應該聽唔到「三年又三年」、「對唔住我係警察」等經典對白。之但係主角間唔中都會講幾句廣東話，而且背景的NPC都係講廣東話，講嘢方式係傾向馬田史高西斯的《無間道風雲》，即係角色係會講粗口，講法仲好地道，內容方面唔細講，玩家自己去領略一下啦！由此證明資料搜集真係做得幾足，形神俱似！另外，無論邊個平台版本都好，香港特典版附送四個DLC內容，每個DLC都有唔同造型靚衫同武器、招式等，不過大家幻想一下，有人喺鬧市着套少林裝（DLC下載包3）周街行都幾爆！

INFO

類型：動作

開發：United Front Games

平台：PS3、Xbox 360、PC

推出日期：今天

售價：$388（PS3）、$389（Xbox 360）、$299（PC）

查詢：2341 2356（PS3）、2418 8896（Xbox 360、PC）