APP士多

一代經典重現《Spy Vs Spy》

相信有番咁上下年紀嘅電視遊戲機迷，都唔會忘記呢款經典之中嘅經典《Spy Vs Spy》。遊戲講述兩個間諜為咗搵鎖匙同物品逃離現場，偏偏又要設下陷阱阻撓對方，仲有不同的道具可以置對方於死地；呢啲鬥整蠱嘅Game，真係好玩得來又考驗友情。

1984年出品

呢隻咁經典嘅遊戲原來已經有28年歷史，咁多年來，已經出過Apple II、雅達利400/800和Commodore 64、NES、世嘉、任天堂GB等版本，不過今次重製版並唔係原製作公司First Star Software獨力炮製，而係同Robots and Pencils公司共同完成。其實，呢套遊戲亦係改編自古巴著名漫畫家安東尼奧．普羅希亞斯創作的同名連環漫畫，一隻咁「骨灰級」嘅遊戲，當然會有唔少人識欣賞。

系統：iOS

下載費用：$8

怒鳥出品《Amazing Alex》

《Angry Birds》系列風靡全球，製作公司Rovio亦因此賺到盆滿缽滿。基本上，只要佢保持間唔中出一兩隻憤怒鳥新版本，已經可以食老本長歎，不過由佢推出呢款《Amazing Alex》嚟睇，可見呢間公司都幾有野心。呢隻遊戲講有位好頑皮但又好有創意嘅細路Alex，點樣用各樣道具堆砌一啲場景，好似人哋推骨牌咁玩，成隻Game極盡玩嘢之能事。

畫風輕鬆 物理準確

由於係同一間公司出品，所以難免要將佢跟《Angry Birds》比較。呢隻遊戲風格明顯繼續走輕鬆惹笑路線，音樂輕鬆、節奏明快，而且《Angry Birds》系列成功之處，其實唔係在於畫面音效，而係精準嘅物理計算，令遊戲十分好玩。呢個特色亦有傳承咗畀《Amazing Alex》，玩落更覺得耐玩性超高。

系統：Android、iOS

下載費用：Android 免費

下載費用：iOS $30

金句王百萬富翁《棟篤手冊》

香港地相信都無咩人唔識黃子華呢位棟篤笑祖師爺，嚟緊十月佢又開Show了。話就話每個Show都可以獨立睇，但唔記得佢啲金句始終都唔夠過癮。近排iOS就出咗呢個《棟篤手冊》，節錄晒黃子華咁耐以來歷年棟篤笑內容，並以百萬富翁問答形式同大家玩遊戲，考考你係唔係佢忠實粉絲。

系統：iOS

下載費用：免費

喪射雀仔《Shoot The Zombirds》

講到要Kill Time，好多人都選擇玩智力遊戲，不過總有人會覺得呢啲遊戲悶。咁呢款打雀遊戲就真係要乜有乜，唔單止介面靚、音效好，仲考反應要射晒啲喪屍雀落嚟，等佢唔可以叼走啲南瓜。加上子彈可一次貫穿幾隻雀，都講究眼明手快o架！

系統：Android

下載費用：免費

畫公仔即Share《LINE Brush》

愈來愈多人用《LINE》，就連關連Apps，好似《LINE Camera》、《LINE Card》都大收旺場。今次再接再厲，喺iOS平台上推出《LINE Brush》，可作手繪創作圖畫或者在照片上繪畫，而且畫畫功能亦比過往幾個Apps完善，最正係畫完可以即刻Share！

系統：iOS

下載費用：免費

無聊種菇《觸摸偵探─菇菇栽培研究室2》

日韓遊戲Apps以育成類居多，因為呢類遊戲確係最能夠消磨時間。日本遊戲多喜歡用溫泉、足球隊呢啲現實世界作背景，反而韓國遊戲古怪啲，今次就玩種菇狂熱，仲要有多達300種菇可以種，雖然聽落怪雞，但隻隻菇個樣都幾可愛，會令人忍唔住沉迷其中。

系統：Android、iOS

下載費用：免費