喇叭孖寶靚聲無線放送

除咗屋企部Hi-Fi之外，相信電腦同手機就係大家最常用嘅聽歌設備，可惜兩者音質都麻麻，想提升音質，高質外置喇叭就唔少得。近期JawBone同Creative都不約而同推出無線喇叭系列，外形靚仔又好聲，好歌就可以無線通屋播喇！

JawBone BIG JAMBOX 磚式音樂加大碼

BIG JAMBOX可以話係之前大受好評的JAMBOX嘅升級版本，磚形設計同JAMBOX如出一轍，不過BIG JAMBOX嘅重量就增至1.23kg，論便攜性就及不上舊版。話雖如此，新機嘅音量、音質又比JAMBOX好得多，皆因除了採用專利的立體驅動單元外，更加上兩個Passive Bass Radiator，令到音量輸出大大提升；試聽後發現低音相當紮實，音量亦比舊版大得多，擺喺大廳度「焚機」都夠晒力水！

藍芽AirPlay

同JAMBOX一樣，新機依舊支援藍芽連接，iPhone、Android等智能手機都可以輕鬆連接無線播歌；而且連接狀態仲會有語音提示，冇芒操作一樣咁方便。另外，喇叭亦內置咪高峰，連接手機之後用佢嚟玩埋Skype、FaceTime都仲得，一物兩用！此外，此機備有內置充電池，充滿電可以連續播放15小時，玩足半日都唔成問題。

Creative Sound BlasterAxx 大中細靚音

而Creative則推出了Sound BlasterAxx系列喇叭，三個型號同樣採用六角柱形設計，其中SBX 8體積最小，仲細過一支385ml樽裝飲品，可惜唔支援藍芽，連接電腦、手機惟有靠3.5mm插頭；而體積較大的SBX 10以及SBX 20就支援藍芽，機背更設有配對鍵，連接方便。而且新系列更特別將兩個驅動單元垂直分開擺放，令到立體聲更加突出。SBX20更內置新一代的SB-Axx1處理器晶片，據講可有效增強音頻，現場試聽流行曲，發現低音雄渾之餘，人聲尤其清晰，效果相當不俗。

獨家音效技術

整個系列的喇叭都內置雙咪高峰，更支援多種CrystalVoice獨家的音效技術，包括可以減低背景噪音的Noise Reduction，而較高階的SBX 10、SBX 20更具備自動調校語音音量的Smart Volume，又特設集中收錄人聲的Voice Focus，用佢嚟講電話都得！值得一提的是，三款喇叭都用上低功耗設計，毋須外接火牛，只須一條USB線供電即可，特別慳電！

查詢：（a）2955 1333、（b）2958 1113